دوێنێ یەكشەممە 8/5/2011 بەڕێز مسعود بارزانی سەرۆكی هه‌رێمی كوردستان لە سەلاحەددین، پێشوازیكرد لەهەردوو سیناتۆری ئەمەریكی جۆن مەككین و لینزی گراهام. لە دیدارێكدا، دوا پەرەسەندنەكانی باری سیاسی و ئەمنی ئێراق و ئەو هەوڵانەی كە لە ئارادان بۆ پڕكردنەوەی وەزارەتە ئەمنییەكان و چارەسەركردنی پرسی ئەنجوومەنی باڵای سیاسەتە ستراتیژیەكان و ئامادەگی ئێراق و هێزەكانی ئەمنی وڵات دوای كشانەوەی هێزەكانی ئەمەریكا گفتوگۆی لەبارەوە كرا، ئەگەر هاتوو ویستێكی هاوبەش لە مانەوەی هێزەكان لە وڵات نەبێت.

هەردوو سیناتۆری ئەمەریكی ستایشی ڕۆڵی سەرۆك بارزانی-یان كرد لە پێكهێنانی حكوومەتی ئێستای ئێراق بە هۆی دەسپێشخەرییە مێژووییەكەی كە توانی هەموو سەركردەكانی قەوارە سیاسییەكانی ئێراق لە هەولێر و دواتر لە بەغدا كۆبكاتەوەو هیوایان خواست ئەمجارەش دەسپێشخەرییەكی دیكە بخاتە ڕوو بۆ چارەسەركردنی ئەو كێشانەی كە ڕووبەڕووی پرۆسەی سیاسی ئێراق بۆتەوە و تەئكیدیشیان لەوەكردەوە كە لە هەر چارەسەرێكدا سەرۆك بارزانی ڕۆڵی سەرەكی دەگێڕێ.

هەروەها هەردوو سیناتۆر ڕۆڵی هێزەكانی هاوبەش لە ناوچە دابڕێندراوەكاندا بەرز نرخاند و داوایان كرد كە زیاتر بایەخ بەو هێزانە بدرێ بۆ پاراستنی ئەمنیەت و سەقامگیری ئەو ناوچانە و ئاماژەشیان بە پێشكەوتنەكانی هەرێمی كوردستان كرد بەتایبەتیی لە بواری ئابووری و ئاوەدانكردنەوەدا، تەئكیدیان لەوەكردەوە كە سەرەڕای ئەو نەهامەتی و مەرگەساتەی كە بە درێژایی مێژوو دووچاری گەلی كوردستان ببۆوە، بەڵام لە سایەی پەیڕەوكردنی سیستەمێكی ئازاد و دیموكرات توانرا قەرەبووی ئەو نەهامەتی و مەرگەساتانە بكرێتەوە، ئەمەش بۆ سیاسەتی حەكیمانەی سەرۆك بارزانی دەگەڕێتەوە.

سەرۆك بارزانی وێڕای خۆشحاڵی دەربڕین بە سەردانەكەی هەردوو سیناتۆر بۆ هەرێمی كوردستان، تەئكیدی لەوەكردەوە كە هەموو هەوڵ و تەقەللاكانی خۆی دەخاتە گەڕ بۆ نزیككردنەوەی دید و بۆچوونی لایەنە سیاسییەكانی ئێراق و چارەسەركردنی ئەو كێشانەی كە ڕووبەڕووی پرۆسەی سیاسی بوونەتەوەو دووپاتیشی لەسەر پابەندبوونی هێز و لایەنە سیاسییە ئێراقییەكان بە ڕێككەوتنەكانی پێشوو كردەوە.