هه‌ردوو مه‌كته‌بی سیاسی پارتی دیموكراتی كوردستان و یه‌كێتیی نیشتمانی كوردستان له‌ 26/4/2011 له‌ هه‌ولێر كۆبوونه‌وه‌ ، بۆ توێژینه‌وه‌و به‌ دواداچوونی بارودۆخی كوردستان و عیراق و ده‌ورو به‌ر . له‌ كۆبوونه‌وه‌كه‌دا هه‌ردوولامان هاورِابووین ، كه‌ بارودۆخی كوردستان به‌ره‌و ئارامی ئه‌رِوات و زه‌مینه‌ی لێك تێگه‌یشتن له‌بارتره‌ . بۆیه‌ جارێكی تر پابه‌ندبوونی خۆمان به‌هێوركردنه‌وه‌ی دۆخی ئێستای كوردستان و گه‌رِانه‌وه‌ بۆ گفتوگۆ له‌ پێناوی لێك تێ گه‌یشتن و چاره‌سه‌ری كێشه‌كان و ده‌ستگرتن به‌ به‌رژوه‌ندی باڵای میلله‌ته‌كه‌مان و پاراستنی ئه‌زموونه‌كه‌مان دووپاتده‌یكه‌نه‌وه‌ .

له‌هه‌مان كاتیشدا به‌رِونی ئاماده‌یی خۆمان بۆ هه‌ر كۆبوونه‌وه‌و و دانوستانێك ده‌رده‌برِین به‌مه‌به‌ستی چاره‌كردنی كه‌موكورتیه‌كان له‌چوارچێوه‌ی دامه‌زراوه‌ شه‌رعیه‌كانی هه‌رێم و ستراتیژی خزمه‌تكردنی خه‌ڵكی كوردستان و داكۆكیكردن له‌به‌رژوه‌ندیه‌كانیان . پێشمان وایه‌ ده‌ستپێشخه‌ری سه‌رۆكی هه‌رێم سه‌باره‌ت به‌ئه‌نجامدانی چاكسازی و ده‌ستپێكردنی گفتوگۆی نێوان هێزو لایه‌نه‌ سیاسیه‌كان چوارچێوه‌یه‌كی گونجاوه‌ بۆ ده‌رچوون له‌م بارودۆخه‌ نا ته‌ندروسته‌ی ئێستاو برِیاره‌ هه‌فده‌خاڵیه‌كه‌ی په‌رله‌مانی كوردستان و هه‌ر پێشنیارێكی دیكه‌ی ئیجابیش بكه‌ینه‌ بنه‌ما .

هه‌ر لێره‌وه‌ هه‌ردوو مه‌كته‌بی سیاسی یه‌كێتی و پارتی جارێكی تر به‌رِوونی پشتیوانی خۆیان بۆ په‌رله‌مانی كوردستان و حكومه‌تی هه‌رێم و هه‌نگاوه‌كانی چاكسازی ده‌ده‌برِن له‌پێناو خزمه‌تكردنی زیاتری خه‌ڵك و به‌رپاكردنی شه‌فافیه‌ت و ئاورِدانه‌وه‌ی زۆرتر له‌چین و توێژه‌ جیاوازه‌كانی كۆمه‌ڵی كوردستان.
وێرِای ده‌ستخۆشیمان له‌هه‌وڵه‌كانی هێوركردنه‌وه‌ی دۆخی سلێمانی و هه‌ندێ شاروناوچه‌ی تر رۆڵی پۆلیس و ئاسایشی ناوخۆو هێزی پێشمه‌رگه‌ و خه‌ڵكی كوردستان له‌هێوركردنه‌وه‌ی دۆخه‌كه‌دا به‌رز ده‌نرخێنین.