سه‌رۆكی حكومه‌تی هه‌رێمى كوردستان پشتیوانی خۆی‌ بۆ ئازادی كاری رۆژنامه‌گه‌ری و رۆژنامه‌نووسان دووپاتكرده‌وه‌ و هیوای‌ خواست هه‌مومان له‌سایه‌ی ئاشتی و ئازادی و دیموكراتیدا درێژه‌ به‌ گه‌شه‌كردن و به‌ره‌وپێشچوونی وڵاته‌كه‌مان بده‌ین له‌هه‌موو بواره‌كاندا.

ئه‌مڕۆ د.به‌رهه‌م ساڵح سه‌رۆكی حكومه‌تی هه‌رێم كوردستان له‌ ساڵیادی 113 ساڵه‌ی ده‌رچوونی یه‌كه‌مین رۆژنامه‌ی كوردیی، بروسكه‌یه‌كی پیرۆزبایی ئاڕاسته‌ی سه‌رجه‌م رۆژنامه‌نووسان كرد، ئه‌مه‌ی خواره‌وه‌ ده‌قه‌كه‌یه‌تی:

له‌یادی 113 ساڵه‌ی ده‌رچونی یه‌كه‌مین رۆژنامه‌ی كوردی به‌ناوی (كوردستان) له‌ سه‌رده‌ستی (میقداد به‌درخان) له‌ 22 نیسانی ساڵی 1898دا گه‌رمترین پیرۆزبایی ئاراستی رۆژنامه‌نووسانی كوردستان و خه‌ڵكی كوردستان ده‌كه‌م.

هیوادارم ساڵڕۆژی رۆژنامه‌گه‌ری كوردی ببێته‌ هانده‌رێك بۆ ئه‌وه‌ی رۆژنامه‌نووسانمان له‌ كه‌شوهه‌وای ئازادی رۆژنامه‌گه‌ریی ئه‌مڕۆی كوردستاندا به‌ ئازادانه‌ و راستگۆیانه‌ روماڵی رووداو و گۆڕانكارییه‌كان بكه‌ن و پیشه‌ییانه‌ هه‌واڵ و زانیارییه‌كان بگوازنه‌وه‌ و هه‌وێنی هێنانه‌دی ئیستقراری سیاسی و كۆمه‌ڵایه‌تی بن كه‌ یه‌كێكه‌ له‌ ئامانجه‌ گرنگه‌كان و رۆڵی میدیای هاوچه‌رخ به‌تایبه‌ت له‌م دۆخه‌ی كه‌ ئه‌مڕۆ هه‌رێمه‌كه‌مانی پێدا تێده‌په‌ڕێ، هه‌رله‌م یاده‌دا جارێكی تر پشتیوانی خۆم بۆ ئازادی كاری رۆژنامه‌گه‌ری و رۆژنامه‌نوسان ده‌رده‌بڕم و هیوادارم هه‌مومان له‌سایه‌ی ئاشتی و ئازادی و دیموكراتیدا درێژه‌ به‌ گه‌شه‌كردن و به‌ره‌وپێشچوونی وڵاته‌كه‌مان بده‌ین له‌هه‌موو بواره‌كاندا.


د.به‌رهه‌م ساڵح
سه‌رۆكی حكومه‌تی هه‌رێمی كوردستان
22/نیسان /2011