سه‌عات 4ی سه‌رله‌ئێواره‌ی ئه‌مرۆ 18/4/2011 په‌رله‌مانی كوردستان به‌سه‌رۆكایه‌تی دكتۆر كه‌مال كه‌ركوكی سه‌رۆكی په‌رله‌مانی كوردستان و ئاماده‌بوونی د.ئه‌رسه‌لان بایز جێگری سه‌رۆكی په‌رله‌مان و فه‌رسه‌ت ئه‌حمه‌د سكرتێری په‌رله‌مان، به‌شی دووه‌می دانیشتنی ژماره‌ (7)ی ئاسایی خولی گرێدانی دووه‌م له‌ساڵی دووه‌می خولی سێیه‌می هه‌ڵبژاردنی به‌رێوه‌برد، كه‌به‌رنامه‌ی كار به‌رده‌وامبوونبوو له‌سه‌ر خستنه‌روو گفتوگۆكردنی پرۆژه‌ یاسای ده‌سته‌ی گشتی نه‌زاهه‌ و یاسای قه‌ده‌غه‌كردنی رێكخستنه‌ حزبییه‌كان له‌ناو ریزه‌كانی پێشمه‌رگه‌و هێزه‌كانی ئاسایشی گشتی.

دواتر مادده‌كانی پێنجه‌م وشه‌شه‌می پرۆژه‌كه‌ خرانه‌وه‌روو كه‌تایبه‌تبوو به‌ئه‌ركه‌كانی ده‌سته‌ی نه‌زاهه‌و له‌لایه‌ن لیژنه‌ په‌یوه‌ندیداره‌كانه‌وه‌ پێشنیازكرا هه‌ردوو مادده‌كه‌ یه‌كبخرێن، ئه‌و پێشنیازه‌ به‌كۆی ده‌نگ په‌سندكراو هه‌ردوو مادده‌كه‌ له‌مادده‌یه‌كی 8برگه‌یی دارشتنه‌وه‌یان بۆ كراو په‌سندكردنی ئه‌و مادده‌یه‌ش به‌زۆرینه‌ی ده‌نگ بوو.

مادده‌ی حه‌وته‌م تایبه‌تبوو به‌چۆنیه‌تی هه‌ڵبژاردن وپاڵاوتنی سه‌رۆكی ده‌سته‌كه‌و له‌ دوو برگه‌ پێكهاتبوو دوای گفتوگۆكردنیان له‌لایه‌ن په‌رله‌مانتارانه‌وه‌، برگه‌ی یه‌كه‌می مادده‌كه‌ دارشتنه‌وه‌ی بۆ كرا و به‌وشێوه‌یه‌ به‌زۆرینه‌ی ده‌نگ په‌سندكرا.

به‌ر له‌كۆتایی هێنان به‌دانیشتنه‌كه‌ سه‌رۆكی په‌رله‌مانی كوردستان په‌رله‌مانتارانی راگه‌یاند، كه‌ سه‌عات 3ی پاشنیوه‌رۆی سبه‌ی 19/4/2011 په‌رله‌مانی كوردستان دانیشتنێكی نائاسایی ئه‌نجامده‌دات به‌ ئاماده‌ببوونی وه‌زیری ناوخۆی حكومه‌تی هه‌رێم له‌باره‌ی رووداوه‌كانی ئه‌م دواییه‌ی هه‌رێم ده‌بێت.

هه‌روه‌ها سه‌باره‌ت به‌دانیشتنی ئاسایی، وتی: بۆ دانیشتنی ئاسایی داهاتوو به‌رده‌وامبوون له‌سه‌ر گفتوگۆكانی ئه‌م پرۆژه‌یه‌ ئاگادارتان ده‌كه‌ینه‌وه‌.