ماوەی نێزیكی سالەكێ یە و ب پشتەڤانییا هندەك وەلاتێن شۆل پێنەهەی ل دەڤەرێ هندەك كەسان، یێن كۆ كەس نزانیتن كۆڕێن كێنە و ژ كیژ ئەسل و فەسلێ نە، یێن هاتین و ل دەڤەرێ خیڤەتەك ڕەش و لبن ئالایەكێ ڕەشتر و ب ماسك و دەمامكێن ڕەشڤە، یا هەلدای و ناڤێ سنوورێن خەیالیێن خۆ یێن كرین " دەولەتا ئیسلامی". دەولەتەك خەیالی و لژێر ناڤەكێ پیرۆز كە پڕە ژ بۆهایێن هەڤدژ و نەوەكی ئێك. ڤێ دەولەتا خەیالی بنیاتێ خۆ یێ لسەر هندەك بۆهایێن كەڤنار و كلاسیكی ئاڤاكرین كە دگەل بۆهایێن هەڤچەرخ ناگۆنجن. ژلایەكێ ڤە درویشمێ ئازادی و ئێكسانیێ یێ كرییە پێخوارنا خۆ و ژلایەك دیتر ڤە بانگەشە یا هندێ دكەن كە دڤێتن لسەر بنەما و پرەنسیپێن ئایینی ڤە ڤێ دەولەتێ بڕێزە ببەن. ل دەمەكی كە ئەڤ پرەنسیپە د بنەڕەتدا هیچ جهەكێ خۆ د ئایینێ پیرۆزێ ئیسلامێدا و هیچ ئایینەك و ڕێبازەكا مرۆڤدۆستانە دا نینە و ژلایەك دیتر ئەوان چ تام و چێژەك د بۆهایێن كەڤندا نەهێلاینە و سنوورێن وان بۆهایان ب جارەكێ لبەر بەرزە بووین. هەروەسا ژی چەند ئەڤ بۆهایێن كەڤن و كلاسیك د ناخ و سایكۆلۆژیایێدا- چ لسەر ئاستێ هەست( لاشعوری) دا و چ لسەر ئاستێ نەخواستیدا( لاشعوری ) _ یێن ل وان تێكچۆین، هند ژی ئەڤ بۆهایە ب تەواوەتی دژی بۆهایێن هەڤچەرخن كۆ جیهان یا د سەردەمێ ئازادییا تاكی و دیمۆكراسیەتێ و فرەباوەری و ڕێز ل بیرۆباوەرێن جیاواز گرتنێ ڤە دچیتن. كریار و درویشمێن ڤێكنەكەفتیێن تیرۆریزمێ ژبلی شاشیێ و نەتەباییا دۆهی و ئەڤرۆكە دا، هند ژی دگەل بۆهایێن ئاییندەیدا ژی ناگۆنجن. دەولەتا بناڤ ئیسلامییا داعشێ بڤان دوریشم و بۆهایێن كلاسیك و ڕەها و ئیدەئالێن دۆهی و مێنتالیتە و ئەقلیەتێ بۆهایێ نۆكە دڤێتن، ل خۆ وەربیتن، بۆ ئاییندەی و نڤشێ داهاتی نیشان بدەن كۆ ل سەردەمەكی دا و ل دەستپێكا هزارەیا سێهەمدا ل ڤێ دەڤەرێ دەولەتەك ئیسلامی هاتە ئاڤاكرن بەلێ لسەر دەستێ نەیار و نەحەزان هاتە ژناڤبرن. نك دلەكی، بۆ خۆ دناڤ بەرپەڕێن دیرۆكێ ناڤەكی تۆمار بكەن.
وان دڤێتن بناسێن ژناڤچۆنا خۆ بێخن ستۆیێ خەلك و هندەك كەس و لایەنێن دیتر. ئەو وێ چەندێ نائیننە بیرا خۆ – یان ژی نائیننە بیرا خۆ و یان ژی بدەستیڤە خۆ ل ڤێ چەندێ ل گێلی ددەن- كۆ ئەگەر و بناسێن نەمان و ژناڤچۆنا وان نەكەس و لایەنك دیتر بووینە، هندی كە بۆهایێن چەواشەكریێن دۆهی د ناڤەرۆكا سایكۆلۆژیایا كەساتیا تاك تاكێ وان نەدگۆنجان دگەل سیستەمێ ژیان و جڤاك و سیاسەت و جیهان و سەردەمێ ئەڤرۆ و سۆبەهیدا. بۆهایێن دژی مرۆڤایەتیێ و كەلتوورێ دەڤەرێ و جیهانێ و سەردەم و خوینڕێژی و دڕندایەتی و هۆڤایەتی بەرامبەر تاك و نەتەوە و ئایین و لایەنێن جیاوازێن دەڤەرێ دێ ل ئاییندەیدا، وەكی دەقەكا ڕەش ب ناڤ چاڤێن وان ڤە مینیتن و ل شوینا ئەو هزرا خەلەت یا كۆ ئەو د مێنتالیتەیا خۆ دا پەروەردە دكەن و ب وان وەرە دێ ناڤەكێ پیرۆز دناڤ بەرپەڕێن دیرۆكێ تۆمار كەن، بەرۆڤاژی دێ مرۆڤایەتی و بەرپەڕێن دیرۆكێ ڤان بۆهایێن دژی مرۆڤایەتیێ بۆ هەتاهەتایە ل بیرێ مینیتن و نەخاسمە ژی، بەرۆڤاژی سەردەمێن كەڤن، ئەڤرۆكە كەرەستە و ئالاڤێن ڕاگەهاندنێ گەلەك ژ دیمەنێن زۆرداری و مالوێرانكەرێن وان یێن تۆماركرین. دیرۆك دێ نیشانی نڤشێ سۆبەهی دەت كۆ تیرۆریزمێ ڤیا بڕێكا هندەك بۆهایێن ڕەها و كلاسیك و خەیالی و كەڤنارێن دۆهی، ئەڤرۆ و سۆبەهی ئاڤا بكەتن بەلێ ژ خرابیێ زێدەتر چ یادگارەك بۆ ئاییندە و نڤشێن داهاتی نەهێلان و بەلگە ژی بۆ ڤێ چەندێ هزاران نموونەنە كە هەتاهەتایە دێ مینن د دلێ مرۆڤایەتیێدا.

• ئەڤ بابەتە یا ل رۆژناما ( وار ) هاتیە بەلاڤكرن ل ژمارە ( 1249 ) ڕێكەفتی (12/1/2015) ل( 6).