سەرۆک کۆماری عێراق رایدەگەیەنێت، کە شاری مووسڵ بەبێ هێزی بیانی رزگار دەکرێتەوە.

ماڵپەڕی فەرمیی سەرۆکایەتیی کۆمار بڵاوی کردووەتەوە، فوئاد مەعسوم، سەرۆک کۆماری عێراق رۆژی پێنجشەممە 20ـی تشرینی یەکەمی 2016 پێشوازیی لە عزەت شابەندەر سیاسەتمەدار و پەرلەمانتاری پێشووی عێراق کردووە.

فوئاد مەعسوم ئاماژەی بەوە کردووە، کە شاری مووسڵ ”بە دەست و مەچەکی هێزە عێراقییەکان“ رزگار دەکرێتەوە و دوای رزگارکردنەوەشی، پێکهاتەکانی پارێزگای نەینەوا ناوچەکانی خۆیان بەڕێوەدەبەن.

کاتژمێر 6ـی سەرلەبەیانیی رۆژی پێنجشەممە 20ـی تشرینی یەکەمی 2016، فەرماندەیی گشتیی هێزەکانی پێشمەرگە دەستپێکردنی ئۆپەراسیۆنێکی پێشمەرگەی رایگەیاند، کە تێیدا پێشمەرگە بە سەرپەرشتیی راستەوخۆی مەسعود بارزانی، سەرۆکی هەرێمی کوردستان و فەرماندەی گشتیی هێزە چەکدارەکانی کوردستان لە سێ قۆڵەوە لە باکوور و باکووری رۆژهەڵاتی مووسڵ، لە میانەی ئۆپەراسیۆنی رزگارکردنەوەی مووسڵ، ئۆپەراسیۆنێکیان بۆ رزگارکردنەوەی ناوچە کوردستانییەکان دەست پێکرد.

پێشتریش لە رۆژی دووشەممە 17ـی تشرینی یەکەمی 2016، فەرماندەیی گشتیی هێزەکانی پێشمەرگەی کوردستان دەستپێکردنی ئۆپەراسیۆنێکی بەرفراوانی بۆ رزگارکردنەوەی مووسڵ لەژێر سەرپەرشتییراستەوخۆی مەسعود بارزانی، سەرۆکی هەرێمی کوردستان لە سنووری میحوەری خازر راگەیاند و ناوچەیەکی فراوانی رۆژهەڵاتی پارێزگای نینەوا لەلایەن هێزەکانی پێشمەرگەوە رزگار کرایەوە.

لە مانگی حوزەیرانی 2014 و لە سەردەمی سەرۆک وەزیرانێتیی نوری مالیکی، دوای هەرەس هێنان و شکستی سوپای عێراق، شاری مووسڵ و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار و چەند ناوچەیەکی باشووری کەرکووک لەلایەن چەکدارانی داعش داگیر کرا.














باسنيوز