كۆمسیۆنی هەڵبژاردنەكان: دەنگدانی تایبەت لە نەینەوا بە هێمنی بەڕێوە دەچێت
سەرچاوەكانی كۆمسیۆنی باڵا دەڵێن، پرۆسەی دەنگدان بە شێوەی كۆمەڵ كۆمەڵە و یەكێكیان كە دێت ئەوی دی دەڕوات، ئەمەیش بۆ نەهێشتنەوەی بۆشایی ئەمنیییە.
كۆمسیۆنی باڵای هەڵبژاردنەكان لە نەینەوا ڕایگەیاند، ئەوانەی دەتوانن دەنگ بدەن ژمارەیان 51 هەزار كەسە و 46 ناوەندی هەڵبژاردنیان بۆ ئامادە كراوە، هەروەها 5 ناوەندیان بۆ ڕوماڵی مێدیاكان تایبەت كراون.
بە هۆی باری ئەمنیی تایبەتەوە، هەڵبژاردنی ئەنجوومەنی پارێزگاكان لە هەردوو پارێزگای نەینەوا و ئەنباردا، لە 20ـ نیسانی ڕابردوو بۆ 20ـی حوزەیران كە ئەم مانگەیە دواخرا؛ هەندێ لە چاودێرانیش لەسەر ئەو باوەڕەن كە بار ی ئەمنیی نەینەوا، لە ئێستادا زۆر لە دۆخی ئەمنییەكەی لە ئازار و نیسان خراپترە.
بە نزیككەوتنەوە لە هەڵبژاردنەكە، لە بەهێزترینی لیستەكان لە نەینەوا دەركەوتن ئەوانیش: (قائمە متحدون) بە سەرۆكایەتیی ئوسامە نوجێفیی سەرۆكی پەرلەمانی عێراق و (نەینەوا شقیقە) كە ئەسیل نوجێفیی پارێزگاری نەینەوا سەرۆكیەتی هەروەها (التعایش والتأخی) كە نوێنەرایەتیی پارتییە كوردییەكان لە پارێزگاكەدا دەكات، لیستی (الوفاو لنینوی) و لیستی (قائمە نینوی الموحدە).
680 كاندید كە سەربە 28 لایەنی سیاسیەن، ململانێیان لەسەر 39 كورسییە. بەپێی كۆمیسیۆنی هەڵبژاردن، ژمارەی دەنگدەرانی نەینەوا دەگاتە ملیۆنێك و 800هەزار و بەسەر 716 ناوەندی هەڵبژاردندا دابەش بوون كە 27هەزار فەرمانبەر تێیاندا كار دەكات.
