8 حوزه‌یران / یۆنیۆ (گوڵان میدیا)- دوای ئەوەی ژمارەیەک لە لیستە براوەکانی ھەڵبژاردنەکانی ئەنجومەنی پارێزگاکان لە پارێزگای سەڵاحەدین، بەپێی ڕێککەوتنێکی سیاسی نێوانیان پۆستە باڵاکانی پارێزگاکەیان بەبێ بەشداری پێ کردنی کورد‌و تورکمان‌و شیعە‌و لیستی موتەحیدین دابەشکرد، بڕیارە یەکشەممەی داھاتوو یەکەم کۆبوونەوەی ئەنجومەنەکە بەڕێوەبچێت.
سەرچاوەیەکی ئاگادار لەو بابەتە ئەوەی ئاشکرای کرد، بەگوێرەی رێککەوتنێکی پێشوو دەبوایە (١٩) کەس لەو (٣٠) کەسەی کورسییەکانی ئەنجومەن پڕدەکەنەوە، حکومەت پێکبھێنن‌و پاشان وتووێژ لەگەڵ ھاوپەیمانی نیشتمانی‌و لیستی پارێزگاری پێشوودا بکەن بەمەبەستی بەشداری پێ کردنیان لە حکومەت دا، بەڵام ئەو (١٩) کەسە حکومەتی ناوخۆیی سەڵاحەدینیان بەبێ بەشداری پێ کردنی کورد‌و شیعە‌و لیستی موتەحیدون و تورکمان پێکھێنا.
د. ئەمین عەزیز جێگری پێشووی پارێزگاری سەلاحەدین، رایگەیاند: ئەو جۆرە رێککەوتنە سەرکەتن بەدەست ناھێنێت، ناتوانن نیسابی یاسایی کە (١٥) کەسە تەواو بکەن، وتیشی: فەرامۆشکردنی کورد لە حکومەتی داھاتووی سەڵاحەدین دا جێگەی قبوڵکردن نییە‌و لە کاتی خۆی دا ھەڵوێستمان دەبێت.