هاوپەیمانیی نیشتمانی ئەمڕۆ شەموو رای گەیاند كە ئەو لێژنە چاكسازییەی لەلایەن پێكهاتەكانی هاوپەیمانیەتییەكە هاتووەتە دامەزراندن بە مەبەستی دانانی نەخشەرێگەیەك بۆ چارەسەركردنی دۆخی عێراق، سبەی دووەم كۆبوونەوەی ساز دەكا و ئاماژەی كرد، لێژنەكە رووماڵی هەموو كێشە هەڵپەسێردراوەكان دەكا و چاویش بە نووسەكانی هەولێر و نەجەف دەخشێنێ.

محەمەد سەیهوود ئەندامی هاوپەیمانیی نیشتمانی بە ئاژانسی كوردستان بۆ دەنگوباس (ئاكانیوز)ی راگەیاند، لێژنەی چاكسازی كار بۆ ئەنجامدانی رووماڵكردنی هەموو كێشە هەڵپەسێردراوەكان دەكا و چاویش بە نووسەكانی هەولێر و نەجەف دەخشێنێ و بۆچوونی خۆی لەبارەی چارەسەركردنی كێشەكان دەخاتە روو.

زیاتر گوتی، قۆناغی ئێستە پێویست بە دانانی خاڵ لەسەر پیتەكان دەكا و ئەوەش لە ژێر چەتری دەستوور ئەنجام دەدرێ و هەموو كێشە هەڵپەسێردراوەكان دەگرێتەوە و ئاماژەی كرد، لێژنەی چاكسازی تاوتوێی كێشەی نێوان بارستە سیاسییەكان و نێوان هەردوو حكوومەتی فیدراڵ و هەرێم و نێوان پێكهاتەكانی هاوپەیمانیەتییەكە دەكا.

سێشەمی رابردوو تەباییی دەوڵەتی یاسا كە نووری مالیكی سەرۆك وەزیرانی عێراق سەرۆكایەتیی دەكا ئاشكرای كرد كە هاوپەیمانیی نیشتمانی نەخشەرێگەیەكی داناوە بۆ چارەسەركردنی تەنگژەی سیاسی لە وڵات و لە چەند رۆژی داهاتوو دەست بە جێبەجێكردنی دەكا.

پێنجشەمی رابردوو پێكهاتەكانی لیستی هاوپەیمانیی نیشتمانی لەسەر پێكهێنانی لێژنەیەكی چاكسازی پێك هاتن و دواتر راگەیندرا كە ئیبراهیم جەعفەری سەرۆكی لێژنەكەیە و هەر پێكهاتەیەكی هاوپەیمانیەتییەكە ئەندامێكی لە لێژنەكە دەبێ و كارەكەشی پشت بە نووسی كۆبوونەوەكانی هەولێر و نەجەف و هاوپەیمانیی نیشتمانی دەبەستێ.

هاوكات هەوڵەكانی لیستەكانی نەیار بۆ مالیكی بۆ لێپرسینەوە لێی لە ناو پەرلەماندا بەردەوامە.