گوتەبێژ و ڕاوێژكارە ئیعلامییەكەی سەرۆكوەزیرانی عێراق، نووری مالیكی، بووەتە كێشەیان و كار گەییشتووەتە ئەوەی كە سنووری دەمبەدمە ببەزێنن و پەلاماری یەكدی بدەن. مالكییش بۆ چاككردنەوەیان كۆبوونەوەیەكی بە پەلەی ڕێك خستووە.
ئاژانسی هەواڵی ئوور لە سەرچاوەیەكی نزیك لە سەرۆكوەزیرانی عێراقەوە بڵاوی كردووەتەوە كە بە هۆی كێشەی نێوان گوتەبێژی حكوومەتەكەی، عەلی دەبباغ و ڕاوێژكارە ئیعلامییەكەی، عەلی مووسەوییەوە، نیگەران بووە و لە هەوڵدایە كێشەی نووسینگەكەی چارە بكات.

بە گوتەی ئەو سەرچاوەیە كێشە و ململانێی نێوان ئەو دوو كەسە سەرەكییەی نووسنگەی مالیكی، كاریگەریی خراپی بەسەر گوتاری میدیایی حكوومەتەوە هەیە.

چەند سەرچاوەیەك لە ناوەندی ڕاگەیاندنی حكوومەت گوتوویانە كە ئەگەر پاسەوانەكان نەبوونایە هەر وەک چۆن مووسەوی و دەبباغ، سنووری دەمەقاڵێیان بەزاند و بە دەست پەلاماری یەكیان دا، کێشەکەیان گەورەتر دەبوو.

كێشەی نێوان ئەو دوو كاربەدەستەی نووری مالیكی، بە هۆی تۆمەتبەخشینەوەیان بووە بەرانبەر بە یەكدی و پەراوێزخستنەوە بووە لە بڕیاردانی پێوەست بە بواری میدیاییدا و هەردوو لا بەمە یەكدی تۆمەتبار دەكەن.