سەرچاوەیەكی ئاگەدار لە حكوومەتى عێراقی رای گەیاند، دوێنێ شاندێكی دەوڵەتی یاسا كە نووری مالیكی سەرۆك وەزیرانى عێراقی سەرۆكایەتیی دەكا سەردانی نەجەفیان كرد بەمەبەستی چاوپێكەوتن لەگەڵ موقتەدا سەدر، بەڵام سەدر ئامادە نەبوو پێشوازییان لێ بكا.

ئەو سەرچاوەیە گوتى، موقتەدا سەدر رەتى كردەوە پێشوازی لەو شاندە كە گرینگترین سەركردەكانی دەوڵەتی یاسا و نوینەرێكی تایبەتی مالیكی لەخۆوە گرتبوو، بەهۆى نەبوونى هاوئاهەنگی پێشوەختە بۆ سەردانەكە.

سەرچاوەكە گوتى، سەردانى شاندەكە وەك خۆیان گوتیان بۆ گەیاندنی هەڵوێستی مالیكی بووە لەبارەى كۆبوونەوەكانى هەولێر و نەجەف.

لە 28ى نیسان/ئەپریلی رابردوو هەریەك لە جەلال تاڵەبانى سەركۆمارى عێراق، مەسعوود بارزانى سەرۆكى هەرێم، موقتەدا سەدر، ئەیاد عەلاوى سەركردەى عێراقییە، ئوسامە نوجێفی سەرۆكى پەرلەمانى عێراق لە هەولێر كۆبوونەوە و نامەیەكی 9 خاڵیان ئاراستەى هاوپەیمانیی نیشتمانی كرد، ئاژانسی هەواڵی كازمییە گواستییەوە.

شەمووى رابردوو جارێكی تر بەبەشداریی موقتەدا سەدر، ئوسامە نوجەیفی و نوێنەری‌ تەباییی عێراقییە ‌و بەرهەم ساڵح‌ و فوئاد مەعسوم سەركردەكانی‌ یەكێتیی‌ نیشتیمانیی‌ كوردستان ‌و رۆژ نوری‌ شاوێس‌ و هۆشیار زێباری‌ سەركردەكانی‌ پارتی‌ دیموكراتی‌ كوردستان ‌و ئەحمەد چەلەبی‌ سەرۆكی‌ كۆنگرەی‌ نیشتیمانیی‌ عێراق، لە شاری‌ نەجەف كۆبوونەوە.