لە دیزانیی نوێی سایتی سەرۆكایەتیی كۆماری عێراقدا كە لەم رۆژانەدا كرایەوە، بەشێكی تایبەت بە سەرۆكایەتیی كۆمار دەردەكەوێ كە تێیدا بەجیا لینكی نووسینگەی سەركۆمار و خزەیر خوزاعیی جێگری و دیوانی سەرۆكایەتیی كۆماری تێدایە، بەڵام ناوی هاشمی لادراوە لە كاتێكدا كە لە دیزاینەكەی پێشتردا هەبووە.

تاریق هاشمی دوای ئەوەی لە ناوەڕاستی تشرینی دووەم/نۆڤێمبەری رابردوو لەلایەن ئەنجوومەنی باڵای دادوەریی عێراقەوە بەتۆمەتی تێوەگلان لە كاری تیرۆریستی فەرمانی گرتنی بۆ دەرچوو بەغدای بەجێ هێشت و لە كوردستان نیشتەجێ بوو، لە سەرەتای مانگی رابردووش هەرێمی كوردستانی بەرەو قەتەڕ و دواتریش بۆ توركیا بەجێ هێشت و ئێستە لەوێ نیشەجێیە.

دوێنێ یەكەم دانیشتنی لەدادگەدانی هاشمی و ژمارەیەك لە پاسەوانەكانی بە بێ ئامادەبوونی خۆی لە بەغدا دەستی پێ كرد.