گوشارەكانی سەر (نووری مالیكی) توندتر دەبنەوە و یەكێك لە گەورەترین پێكهاتەكانی شیعەكان هەڕەشەی لێسەندنەوەی متمانە دەكات، ئەگەر لە پازدە ڕۆژدا بەندەكانی ڕێككەوتننامەكەی هەولێر جێبەجێ نەكرێن.

كوردیش لە دوای كۆبوونەوەكەی هەولێرەوە، زۆرترین گوشاری لەسەر حكوومەتی بەغدا و (مالیكی) دروست كردووە.

لە بەیاننامەیەكدا كە دوێنێ “سەدر”ـییەكان لە پەرلەماندا بڵاویان كردبوویەوە، سەرۆكەكەیان (موقتەدا سەدر) تاكڕۆییەكانی (مالیكی) بە مەترسی بۆ سەر شیعە و عێراقیش لە قەڵەم دەدات.

(موقتەدا) كە هەفتەی پێشوو بەشداریی كۆوونەوەكەی هەولێری كرد لە نێوان كورد و سوننەدا و ئەویش نوێنەرێكی شیعە بوو، دەڵێت: “هەڵسوكەوتی تاكڕۆیانەی حكوومەت قەیرانێكی سیاسیی دروست كردووە. هەروەها زیانی بە ماڵی شیعە و هەموو عێراقیش گەیاندووە.”

پەرلەمانتاری كورد لە بەغدا (فاتیح دارۆغایی) ئەم هەڵوێستەی (موقتەدا) لەم كاتەدا بە گرنگ دەزانێت؛ بەو پێیەی تاكڕۆیی (مالیكی) وای كردووە هەندێك لایەنی شیعەكانیش بێزار ببن و ئەو لایەنانەی بەم هۆیەوە بێزار بوون، دەیانەوێ پەنا بۆ یەكدی بەرن.

شارەزای سیاسی (د. بوخاری عەبدوڵڵا) بەرزبوونەوەی ناڕەزایەتییەكان لە دژی (مالیكی) بە چەند هۆیەك دەزانێت؛ كە ویستی هەندێك لایەن گۆڕانكاریی بنەڕەتی و گەڕانەوەیە بۆ دەستوور، بەڵام هەندێك لایەنی ناو “هاوپەیمانیی شیعەكان”، ئەم ناڕەزایەتییانە وەك دەرفەتێك تەماشا دەكەن كە دەیانەوێت شوێنی (مالیكی) بگرنەوە و پۆستیان دەست بكەوێت.

پێشتریش كورد و سوننەكان لە ئەدای سەرۆكوەزیرانەكەی عێراق و حكوومەتەكەی ڕازی نەبوون و ئێستا چەند لایەنێكی سوننەیشی هاتووەتە سەر.

سەدرییەكان كە 40 كورسییان لە پەرلەماندا هەیە، باسی لێسەندنەوەی متماتە لە (مالیكی) دەكەن ئەگەر ڕێككەوتننامەی هەولێر جێبەجێ نەكات.

بە ڕای (دارۆغایی) گرفتەكان ناگاتە متمانەلێسەندنەوە؛ چونكە (مالیكی) مل بۆ داواكان دەنێت، بەڵام ئەگەر سەدرییەكانی ناو پەرلەمان دەنگ بۆ ئەمە بدەن، ئەوا ئەگەری لێسەندنەوەی متمانە زیاتر دەبێت.

(دكتۆر بوخاری) متمانەوەرگرتنەوە بەوەوە دەبەستێتەوە كە ئەگەر سەرۆكوەزیرانی عێراق لەو تاكڕۆیی و فەلسەفە سیاسییەی ئێستای بەردەوام بێت؛

بەڵام ئەگەر نەتوانرا لە پەرلەمانەوە ئەو كارە بكرێت، ئەوا دوور نییە لایەنەكان داوای هەڵوەشاندنەوەی پەرلەمان و حكوومەت و ئەنجامدانی هەڵبژاردنی پێشوەختە بكەن.

گوشاری كورد و پێكهاتەكانی دیكەی عێراق، گەییشتووەتە ئاستێك كە لیستەكەی (مالیكی) جارێك باس لە گۆڕینی سەركوەزیران بە (ئیبراهیم جەعەفەری) و جارێكی دیكە باس لە ئەنجامدانی هەڵبژاردنی پێشوەختە دەكەن.

(حەسەن سنێد) كە پەرلەمانتارێكی لیستی دەوڵەتی یاسای (مالیكی)ـیە، لێسەندنەوەی متمانە لە سەرۆكوەزیران بە كارێكی بێسوود بۆ ئێستا دەزانێت و داوای هەڵوەشاندنەوەی پەرلەمان و هەڵبژاردنی پێشوەختە دەكات.

بە گوتەی (بوخاری عەبدوڵڵا) لە پەرلەمانەوە لێسەندنەوەی متمانە پێشنیاز نەكراوە، بەڵام دوور نییە لایەنەكان پێشنازێكی لەو شێوەیە بكەن.

(دارۆغایی) ئەو گوشارە كە ئێستا لەسەر شیعەكان و بە تایبەتی (مالیكی) دروست بووە، بە پلەی یەك بۆ كورد دەگەڕێنێتەوە كە لە دەرەنجامی قورسایی كۆبوونەوەكەی هەفتەی ڕابردووی هەولێرەوە بووە؛

بێجگە لەوەیش سوننە و بەشێكی شیعەكانیش ناڕەزایەتییەكانیان دژ بە حكوومەتی ئێستای عێراق بەرز بووەتەوە و بە تاكڕۆیی دەزانن.