بریاره‌ نوێنه‌رانی لایه‌نه‌ سیاسییه‌كان له‌ كۆبوونه‌وه‌ی داهاتووى لیژنه‌ى ئاماده‌كاریى كۆنگره‌ى نیشتیمانیى عێراق كه‌ بڕیاره‌ رۆژی یه‌كشه‌ممه‌ی داهاتوو ئه‌نجام بدرێت باس له‌ دۆسیه‌ هه‌ڵپه‌سێردراوه‌كان بكه‌ن وه‌ك هه‌نگاوێك بۆ زه‌مینه‌خۆشكردن و دابینكردنی كه‌شوهه‌وایه‌كی گونجاو بۆ سه‌ركه‌وتنی كۆنگره‌ی نیشتیمانی .

خوزه‌یر خوزاعی جێگری سه‌رۆك كۆماری عێراق له‌ به‌یاننامه‌یه‌كدا رایگه‌یاند كۆبوونه‌وه‌ی دوو رۆژی رابردووی لایه‌نه‌ سیاسییه‌كان سه‌ركه‌وتوو بوو .

روونیشیكرده‌وه‌ كه‌ نیازیان هه‌یه‌ هه‌موو لایه‌نه‌كان به‌شداری بكه‌ن له‌ كۆنگره‌ی نیشتیمانی و له‌ سه‌ره‌تای هه‌فته‌ی داهاتووشدا باس له‌ هه‌موو مه‌سه‌له‌ هه‌ڵپه‌سێردراوه‌كان ده‌كرێت .

مریه‌م ئه‌لره‌یس راوێژكاری نووسینگه‌ی نوری مالكی سه‌رۆك وه‌زیرانی عێراقیش رایگه‌یاند رۆژی یه‌كشه‌ممه‌ی داهاتوو بۆ ئه‌نجامدانی كۆبوونه‌وه‌ی سێیه‌می لژنه‌ی ئاماده‌كاری بۆ تاوتۆكردنی پێشنیارو راسپارده‌كانی فراكسیۆنی عێراقییه‌و هاوپه‌یمانی كوردستانی دیاریكراوه‌ .