حه‌مید زوبێعى ئه‌ندامى ئیئتیلافى عێراقییه‌ له‌ لێدوانێكدا رایگه‌یاند: كه‌ تاكه‌ رێگا بۆ چاره‌سه‌ركردنى قه‌یرانى سیاسى ئه‌مرۆى عێراق، پابه‌ندبوونه‌ به‌ جێبه‌جێ كردنى گشت ئه‌و رێككه‌وتنانه‌ كه‌ پێشتر لایه‌نه‌ سیاسیه‌كانى عێراق له‌سه‌رى رێككه‌وتوون، به‌ تایبه‌تیش رێككه‌وتنه‌كه‌ى هه‌ولێر.

وه‌ك زوبێعى گوتى: گشت ئه‌و رێككه‌وتنه‌ كه‌ پێشتر لایه‌نه‌ سیاسیه‌كانى عێراق رێككه‌وتوون له‌سه‌رى به‌ تایبه‌تیش رێككه‌وتنه‌كه‌ى هه‌ولێر، بنه‌ماى راسته‌قینه‌ن بۆ تێكه‌نه‌چوونى ره‌وشى سیاسى عێراق و ئێستاش جێبه‌جێ كردنى ئه‌و رێككه‌وتنانه‌ له‌لایه‌ن لایه‌نه‌ سیاسیه‌كان، قه‌یرانى سیاسى عێراق چاره‌سه‌ر ده‌كات.

ناوبراو ئاماژه‌ى به‌وه‌شدا، سه‌ركه‌وتنى كۆنگره‌ى نیشتیمانى نێوان هێزه‌ سیاسیه‌كان، به‌نده‌ به‌ جێبه‌جێ كردنى ناوه‌ڕۆكى ئه‌و رێككه‌وتنانه‌ و دووپاتیشى كرده‌وه‌، هه‌ر گیز ئیئتیلافى عێراقییه‌ جێبه‌جێ كردنى ئه‌و رێككه‌وتنانه‌ى نه‌كردووه‌ته‌ مه‌رج بۆ به‌شداریكردنى له‌ كۆنگره‌ى نیشتیمانى.