لێژنەی یاساییی لە پەرلەمانی عێراق ئەمڕۆ سێشەم كۆتاهێنانی لە ئامادەكردنی پڕۆژەیاسای لێبوردنی گشتی راگەیاند و ئاماژەی كرد، بەمەبەستی دەنگدان پڕۆژەیاساكە بۆ سەرۆكایەتیی پەرلەمان عێراق بەرز كرایەوە.

خالید شوانی سەرۆكی لێژنەكە بە ئاژانسی كوردستان بۆ دەنگوباس (ئاكانیوز)ی راگەیاند، لێژنەی یاساییی پەرلەمانی عێراق بەهاوكاریی دەسەڵاتی دادوەری و ئەنجوومەنی راوێژكاریی وڵات و رێكخراوەكانی كۆمەڵی مەدەنی، تاوتوێكردنی پڕۆژەیاسای لێبوردنی گشتی بەكۆتا هێنا.

زیاتر گوتی، لێژنەكە دوا شێوەی پڕۆژەیاساكە و دوا راپۆرتی خۆی ئامادە كرد و بۆ سەرۆكایەتیی پەرلەمانی رەوانە كردووە و ئاماژەی كرد، هیچ بەرهەڵستی یان ناكۆكی لەبارەی پڕۆژەكە لە نێوان لایەنەكانی عێراقەوە نییە.

یاسای لێبوردنی گشتیی یەكێكە لە بڕگەكانی ئەو رێككەوتننامە سیاسییەی رێگەی بۆ پێكهاتنی حكوومەتی عێراق خۆش كرد و وای لە رەوتی سەدر كرد كە پاڵپشتی لە خۆپاڵاوتنەوەی نووری مالیكی بكا.

پەرلەمانی عێراق لە ئەیلوول/سێپتێمبەری رابردوو بەشێوەیەكی سەرەتایی دەنگی لەسەر پڕۆژەیاساكە دا كە لەلایەن رەوتی سەدرەوە پێشكێش كرا.