هاوپه‌یمانى كوردستانى رایگه‌یاند كه‌ گه‌ڕانه‌وه‌یان بۆ دانیشتنه‌كانى ئه‌نجوومه‌نى نوێنه‌رانى عێراق دواى ئه‌وه‌ى هات كه‌ فراكسیۆنى ده‌وڵه‌تى یاسا له‌ به‌رامبه‌ر لێدوانه‌كه‌ى حوسێن ئه‌سه‌دى ئه‌ندامى ئه‌نجوومه‌نى نوێنه‌ران له‌ سه‌ر فراكسیۆنى ده‌وڵه‌تى یاسا به‌ شێوه‌یه‌كى فه‌رمى داواى لێبوردنى كرد، ئه‌مه‌ش دواى ئه‌وه‌ دێت كه‌ حوسێن ئه‌سه‌دى، به‌ڕێز جه‌لال تاله‌بانى سه‌رۆك كۆمارى عێراقى به‌وه‌ تاوانباركردبوو كه‌ یاساى به‌رنگاربوونه‌وه‌ى تیرۆر ئه‌ویش ده‌گرێته‌وه‌، له‌به‌رئه‌وه‌ى تارق هاشمى لای خۆى شاردۆته‌وه‌، كه‌ له‌ لایه‌ن دادگاوه‌ داواكراوه‌.

له‌م باره‌یه‌وه‌ فه‌رهاد ئه‌ترۆشى گوته‌بێژى فراكسیۆنى هاوپه‌یمانى كوردستانى و په‌ریزاد شه‌عبان ئه‌ندامى ئه‌نجوومه‌نى نوێنه‌ران له‌ سه‌ر فراكسیۆنى هاوپه‌یمانى كوردستانى له‌ لێدوانێكى تایبه‌ت دا بۆ كوردستان تى ڤى لێدوانه‌كه‌ى ئه‌سه‌دى یان ئیدانه‌ و شه‌رمه‌زاركرد و هۆكارى به‌شداریكردنى فراكسیۆنى هاوپه‌یمانى كوردستانى له‌ دانیشتنه‌كانى ئه‌نجوومه‌نى نوێنه‌رانى عێراق بۆ ئه‌وه‌ گه‌رانده‌وه‌ كه‌ خالد ئه‌لعه‌تیه‌ سه‌رۆكى فراكسیۆنى ده‌وله‌تى یاسا وتارێكى تایبه‌تى له‌ دانیشتى ئه‌نجوومه‌نى نوێنه‌رانى عێراق خوێنده‌وه‌ و به‌ شێوه‌یه‌كى فه‌رمى لێدوانه‌كه‌ى ئه‌سه‌دى شه‌رمه‌زاركرد و داواى لێبوردنى كرد.