بۆ گفتوگۆكردن له‌سه‌ر ئه‌و دۆسیانه‌ی كه‌ به‌هه‌ڵواسراوی ماونه‌ته‌وه‌، هه‌فته‌ی داهاتوو فراكسیۆنه‌ سیاسییه‌ كوردییه‌كان له‌به‌غدا كۆبوونه‌وه‌یه‌ك ئه‌نجامده‌ده‌ن.
له‌وباره‌یه‌وه‌ حه‌سه‌ن جیهاد ئه‌ندام په‌رله‌مانی عیراق به‌ PUKmedia ی راگه‌یاند: دیاره‌ كۆبوونه‌كه‌ی فراكسیۆنه‌ سیاسییه‌ كوردییه‌كان بۆ ئه‌و بارودۆخه‌ وه‌ستاوه‌ی ئێستای عیراقه‌ كه‌ له‌ڕووی سیاسییه‌وه‌ ته‌نگژه‌یه‌كی قووڵی هه‌یه‌و كۆمه‌ڵێك دۆسیه‌ش هه‌ن كه‌ تائێستا نه‌بڕاونه‌ته‌وه‌.
وتیشی: لایه‌نێكی تری كۆبوونه‌وه‌كه‌ قسه‌كردنه‌ له‌سه‌ر دۆسیه‌ی حه‌سانه‌ بۆ سه‌ربازه‌ ئه‌مریكییه‌كان و راهێنه‌ره‌كانیان كه‌ له‌عیراق ده‌مێننه‌وه‌، واته‌ كۆبوونه‌وه‌كه‌ی هه‌فته‌ی داهاتووی فراكسیۆنه‌ سیاسییه‌ كوردییه‌كان له‌به‌غدا به‌شێوه‌یه‌كی گشتی بۆ گفتوگۆ و قسه‌كردن ده‌بێت له‌سه‌ر ئه‌و دۆسیانه‌ی كه‌ ماونه‌ته‌وه‌ له‌گه‌ڵ بارودۆخی سیاسی ئێستای عیراق.