به‌وته‌ی به‌ڕێوه‌به‌ری نووسینگه‌ی وه‌زاره‌تی مافی مرۆڤ له‌به‌سره‌، له‌قه‌زای فاو روفاتی 100 سه‌ربازی عیراقی و 3 سه‌ربازی ئێرانی دۆزراونه‌ته‌وه‌.

مه‌هدی ته‌میمی له‌لێدوانێكیدا به‌ سۆمه‌رییه‌ نیوزری راگه‌یاند: له‌دوو هه‌فته‌ی رابردوودا روفاتی 103 سه‌ربازی عیراقی و ئێرانی دۆزراونه‌ته‌وه‌ كه‌ له‌كوژراوانی جه‌نگی یه‌كه‌می كه‌نداون و زۆربه‌ی ئه‌و روفاتانه‌ش ناسنامه‌كانیان زانراوه‌.

به‌ڕێوه‌به‌ری نووسینگه‌ی وه‌زاره‌تی مافی مرۆڤ له‌به‌سره‌ راشیگه‌یاند: به‌هاوكاری هه‌ردو وه‌زاره‌تی به‌رگری و ته‌ندروستی و ئه‌نجوومه‌نی پارێزگای به‌سره‌ هه‌وڵی گه‌ڕان به‌رده‌وامه‌ بۆ دۆزینه‌وه‌ی روفاتی له‌ناوچه‌كه‌دا و بڕیاریشه‌ له‌ 11ی مانگی داهاتوودا روفاتی ئه‌و سێ سه‌ربازه‌ ئێرانییه‌ راده‌ستی وڵاته‌كه‌یان بكرێته‌وه‌.