لەو كاتەوە تیرۆریستانی داعش هێرشیان كردۆتە سەر كوردستان كەوا بۆ نزیكەی دووساڵ دەچێت، بەڕێز مسرور بارزانی وەك پێشمەرگەیەك لە بەرەكانی شەڕ هاوشانی پێشمەرگە قارەمانەكانی كوردستان لە سەنگەری پێشەوەی شەڕی بەرگریكردنە لە خاكی پیرۆزی كوردستان. ئەو وەك راوێژكاری ئەنجومەنی ئاسایشی نیشتمانی كوردستان خاوەنی ئەزموونێكی گەورەیە لە شەڕی دژی تیرۆریستان و ئەو سەقامگیری و ئارامییەی كوردستان لەماوەی ساڵانی رابردوو بە خۆیەوە بینیوە، بەرهەمی پلانەكانی ئەنجومەنی ئاسایشی نیشتمانی كوردستان و رۆڵە قارەمانەكانی ئەو دەزگایەن كە شەو و رۆژیان خستۆتە سەریەك بۆ پاراستنی سەلامەتی و كەرامەتی هاووڵاتیانی كوردستان، لە ماوەی نزیكەی دووساڵی شەڕی داعشیشدا كە هێزی پێشمەرگە لە سەرەتاوە ئەزموونێكی ئەوتۆی لە شەڕی دژی تیرۆریستان نەبوو، بە سەرپەرشتی و ئامادەبوونی راستەوخۆی مسرور بارزانی، توانرا ئەزموون و شارەزایی ئەنجومەنی ئاسایشی نیشتمانی بگوازرێتەوە بۆ ناو هێزی پێشمەرگە و تەرازووی هێزی شەڕەكە بۆ بەرژەوەندی پێشمەرگە بگۆڕێت، لەسەر ئاستی نێودەوڵەتیش لەماوەی دوو ساڵی رابردوودا، مسرور بارزانی دەنگی راستەقینەی پێشمەرگە بووە لە میدیاكانی جیهاندا و توانی زۆر بە سەركەوتوویی پێداویستییەكانی پێشمەرگە لەناو رای گشتی دەوڵەتانی هاوپەیمانی نێودەوڵەتی دژی داعش وێنا بكات و سەرنجی میدیاكانی جیهان بۆ سەركەوتنەكان و پێداویستییەكانی پێشمەرگە رابكێشێت، زیاد لەمەش دوای ئەوەی بە سەرپەرشتی راستەوخۆی سەرۆك بارزانی و فەرماندەیی مسرور بارزانی توانرا بەنداوی مووسڵ و ناوچەی زومار ئازادبكرێت، پەرلەمانی ئەوروپا بەفەرمی بانگهێشتی راوێژكاری ئاسایشی نیشتمانی كوردستانیان كرد بۆ ئەوەی لەناو پەرلەمانی ئەوروپادا لە زاری ئەوەوە گوێ بۆ سەركەوتنەكانی پێشمەرگە بگرن، دوای ئەوەش لەگەڵ ژمارەیەك لە وەزیرانی بەرگری دەوڵەتانی ئەندامی یەكێتی ئەوروپا بەتایبەتی لەسەر ئەم پرسە كۆبوونەوەی ئەنجامدا، لە ئێستاشدا كە بەرنامە و پلانی ئەنجومەنی ئاسایش و سەركەوتنەكانی پێشمەرگە بوونەتە سیمبولی تێكشكاندنی داعش لە ناوچەكە، هێزەكانی دژەتیرۆری ئەنجومەنی ئاسایش توانیویانە گەورەترین ئۆپەراسیۆنی هاوبەش لەگەڵ هێزە تایبەتەكانی ئەمریكا لەناو جەرگەی دەوڵەتی خەلافەتی ئیسلامی داعش ئەنجامبدەن، لەسەر زەمینەی ئەم سەركەوتنە گەورانەی پێشمەرگە، ئێستا كوردستان بەرەو ئایندەیەكی گەش هەنگاو هەڵدەگرێت. لە هەمانكاتدا رووبەڕووی چەندین قەیرانی سیاسی و دارایی قورس بۆتەوە. بۆ قسەكردن لەسەر ئەم پرسانە بە شێوەیەكی گشتی و چۆنیەتی رووبەڕووبوونەوەی قەیرانەكانی ئێستا، ئەم دیمانە تایبەتەمان لەگەڵ بەڕێز مسرور بارزانی ئەندامی مەكتەبی سیاسی پارتی دیموكراتی كوردستان و راوێژكاری ئەنجومەنی ئاسایشی نیشتمانی كوردستان ئەنجامداو بەمجۆرە وەڵامی پرسیارەكانی گوڵان-ی دایەوە.

مسرور بارزانی راوێژكاری ئەنجومەنی ئاسایشی نیشتمانی كوردستان بۆ گوڵان:گرنگە ریفراندۆم ببێتە ئەو هۆكارەی یەكڕیزیی ناوماڵی كورد رێكبخاتەوە و دەبێت دەستكەوتە نیشتمانییەكانیش بۆ هەموو لایەك بێت


* لە دوای هێرشەكانی داعش بۆ سەر كوردستان، هەردوو ساڵی 2014 و 2015 ساڵی خۆسەلماندنی كوردستان بوو، بەوەی دەتوانێت خاكی خۆی لە تیرۆریستان بپارێزێت. سوپاس بۆ خوا و سەركردایەتی حەكیمانەی سەرۆك بارزانی و ئیرادەی پێشمەرگەی كوردستان، ئێستا هەموو جیهان دان بەو راستییەدا دەنێت كە كوردستان خۆی سەلماندووە، لەسەر ئەم بنەمایە ئومێدێكی گەورە هەیە كە ساڵی 2016 ساڵی كوردستان بێت. ئایا بەڕێزتان دوای تێپەڕاندنی ئەو دوو ساڵە قورسە، خوێندنەوەتان بۆ 2016 چییە؟ ئایا ئومێد دەكەن ئەمساڵ ساڵی كوردستان و راگەیاندنی دەوڵەتی كوردستان بێت؟
- هیوادارم ئەمساڵ ساڵی سەركەوتنی كوردستان و گەیشتن بە هەموو مافە رەواكانی گەلەكەمان بێت، بەڵام پێویستە واقیعی بین. هێشتا داعش وەك مەترسییەكی سەرەكی ماوە و پێویستە بەردەوام بین لە شەڕی تیرۆر و پاراستنی هەرێمی كوردستان. هەروەها كوردستان چەندین قەیرانی تری بەخۆوە بینیوە، وەك قەیرانی دارایی و قەیرانی سیاسی، بۆ چارەسەركردنی ئەم قەیرانانەش كاری جددی پێویستە و هیوادارم هەموویان لە ئەمساڵدا چارەسەر بكرێن.

* لەوانەیە ئەمە یەكەمین جار بێت ئەو هەلە بۆ كوردستان هاتبێتە پێشەوە، كە سەرۆك بارزانی راستەوخۆ لەگەڵ هەموو سەرۆكەكانی جیهان زۆر بە روونی و راشكاوی باس لە دامەزراندنی دەوڵەتی كوردستان بكات. ئەوەی جێگەی بایەخ و سەرنجیشە جەنابی سەرۆك دەیەوێت پرۆسەی سەربەخۆیی كوردستان بە شێوەیەكی ئاشتییانە و بە رێگەی دیالۆگ و لێكتێگەیشتن لەگەڵ جیهان و دەوڵەتانی ئیقلیمی ئەم پرۆسەیە بەڕێوەبەرێت. ئایا تاچەند دەوڵەتانی رۆژئاوا و دەوڵەتانی ئیقلیمی وەڵامدانەوەی ئیجابییان بۆ ئەم هەوڵانەی سەرۆك بارزانی هەیە؟
- سەربەخۆیی مافێكی سروشتی گەلەكەمانە و كەس ئەو مافە بە ئێمە نابەخشێت، بەڵكو لێمان سەندراوە و پێویستە هەر كاتێ بۆمان كرا، مومارەسەی ئەو مافە بكەین. ئێستا زۆر لە وڵاتانی دنیا دان بەوەدا دەنێن كە غەدرێكی مێژوویی لە خەڵكی كوردستان كراوە و وەك هەموو گەلانی جیهان مافی دیاریكردنی چارەنووسی خۆیان هەیە. جەنابی سەرۆك زۆر بە باشی لە واقعی ئەمڕۆ و جیوپۆلۆتیكی ناوچەكە تێدەگات و تەنیا راگەیاندنی سەربەخۆیی كۆتایی كێشەكە نابێت، بەڵكو پێویستە بتوانین بە سەركەوتوویی وڵاتێكی سەربەخۆ بەڕێوە ببەین. بۆ ئەمەش پێویستە دیالۆگ و گفتوگۆ لەگەڵ ولاتانی دراوسێ و زلهێزەكان و بەتایبەتی لەگەڵ عێراق بكەین، بۆ ئەوەی بزانن مادام سیستەمی فیدڕاڵی و سیستەمەكانی تری حوكمڕانی لە عێراق نەیانتوانیوە چارەسەری كێشەكانمان بكەن، پێویستە بۆ رێگرتن لە شەڕ و ماڵوێرانی بیر لەوە بكەینەوە كە وەك دوو دراوسێ و هاوپەیمان لەگەڵ عێراقدا بژین و پێویستە خەڵكی كوردستان بڕیار لەسەر شێوازی حوكمڕانی و مافی چارەنووسی خۆی بدات. لەبەر ئەوەش ئەم باسە زۆر بە چڕی ئێستا لەگەڵ هەموو وڵاتانی دیكەی دنیا باسی لێوە دەكرێت.

* لەسەر ئاستی ناوخۆیی كوردستان، یەكڕیزی و یەكهەڵوێستی هەموو حزبە سیاسییەكان و خەڵكی كوردستان فاكتەری سەرەكییە بۆ سەرخستنی ریفراندۆم و پرۆسەی سەربەخۆیی، سەرۆك بارزانی لە پەیامەكەی سەری ساڵدا، نەخشەڕێگەیەكی لەسەر ئاستی ناوخۆ بۆ حزبە سیاسییەكان راگەیاند و بەشی هەرە زۆری لایەنە سیاسییەكان پشتگیریان لێكرد. ئایا تاچەند رێكخستنەوەی نێوماڵی كوردستان و یەكڕیزی لایەنە سیاسییەكان بۆ پرۆسەی ریفراندۆم و سەربەخۆیی گرنگە؟ ئایا پارتی دیموكراتی كوردستان تاچەند لەسەر ئەم پرسە بەرنامەی هەیە بۆ ئەوەی لە پێناوی پاراستنی بەرژەوەندی گەلی كوردستاندا نەرمیی زیاتر بنوێنێت؟
- بێگومان یەكڕیزی و یەكهەڵوێستی لایەنە سیاسییەكانی كوردستان و گەلی كوردستان بەگشتی گەورەترین فاكتەری سەركەوتنی گەلەكەمانە. جەنابی سەرۆك رایوایە پێویستە خەڵكی حەكەم بن و خۆیان بڕیار لەسەر داهاتووی خۆیان بدەن، بەڵام بەداخەوە هەندێك جار بەرژەوەندیی تەسكی حزبی رێگە لەئامانجە نەتەوەیی و نیشتمانییەكانمان دەگرن. بۆیە حەق وایە هەر لایەنێك بەرژەوەندییە گشتییەكان بكاتە قوربانیی دەستكەوتی تایبەتی، ئەوا بكەوێتە ژێر پرسیاری خەڵك و بەرامبەر بە دەرئەنجامی هەڵوێستەكانی بەرپرسیار بێت. پارتی كە حزبێكی نەتەوەیی و نیشتمانییە هەمیشە پێیوابووە كە بەرژەوەندییە باڵاكان بخاتە سەرووی بەرژەوەندیی حزبی و ئێستاش ریفراندۆم وەك پرۆسەیەك كە هەموو لایەنێك كۆبكاتەوە، گرنگە ببێتە ئەو هۆكارەی یەكڕیزیی ناوماڵی كورد رێكبخاتەوە و دەبێت دەستكەوتە نیشتمانییەكان بۆ هەموو لایەك بێت. پێویستە هەموو بە یەكەوە بڕیار لەسەر ئایندەی خۆمان بدەین، ئەوەش كارتێكی بەهێز دەبێت كە ئەنجامدانی ریفراندۆم و ئەنجامەكانی ریفراندۆم بڕیاری نەتەوەیەكە و داوای مافی سرۆشتی خۆی دەكات و كەس ناتوانێت دژی ئەمە بوەستێت كە گەلێك باس لە هەست و خواست و ویستی خۆی بكات.

* ئامانج لە پرۆسەی ریفراندۆم وەك باس دەكرێت ئەوەیە، پاش ئەوەی پرۆسەی ریفراندۆم بە سەركەتوویی كۆتایی دێت، لە سەر ئاكامی ئەم ریفراندۆمە بڕیارە یەكەمجار لەگەڵ بەغدا وتووێژ بكرێت، ئەوجا لەگەڵ دەوڵەتانی دراوسێ. ئایا تاچەند ئاكامی ئەو ریفراندۆمە بەو ئاستە گرنگە كە ببێتە زەمینەیەك بۆ قسەكردن لەگەڵ بەغدا و دەوڵەتانی دراوسێ و كۆمەڵگەی نێودەوڵەتی؟
- ئەنجامدانی ریفراندۆم گرنگە بۆ ئەوەی بزانرێت خەڵكی كوردستان چی دەوێت. پێویستە ئەوەشمان لەبیرنەچێت، كە ریفراندۆم دەربڕینی رای خەڵكە نەك راگەیاندنی سەربەخۆیی، بۆیە زۆر پێم سەیرە هەندێك كەس دەڵێن كات گونجاو نییە بۆ ریفراندۆم. چۆن كات گونجاو نییە بۆ ئەوەی خەڵك بڵێن چییان دەویت؟ ئەنجامی ریفراندۆم باشترین بەڵگە دەبێت بۆ دیاركردنی ویستی خەڵكی كوردستان. ئەمە بڕیارێكی یەكلاكەرەوە و هەمەلایەنەیە و سەركردایەتی ملكەچی بڕیاری خەڵك دەبێت و لەسەر بنەمای بڕیاری زۆرینەی خەڵكی كوردستان دەكرێت باس لە ئایندە و شێوازی حوكمڕانی و بڕیاری سیاسی بكرێت. ئێمە نامانەوێت بە شەڕ و توندوتیژی كێشەكان یەكلایی بكەینەوە، چونكە لەو بڕوایەدا نین هیچ لایەنێكمان لەوەدا سەركەوتوو بین، بەڵام بە لەیەك تێگەیشتن و قەناعەت بە یەكتر كردن، دەتوانین ئایندەیەكی رووناكتر بۆ خۆمان و بۆ گەلانی دەوروبەریش دەستەبەر بكەین، بۆ ئەوەش پێویستە لەگەڵ عێراق بە وردی قسەی لەسەر بكەین و لەوە تێبگەن كە مادام ناتوانن كورد وەك هاوبەش و یەكسان ببینن، ئیتر كاتی ئەوەیە رێگەبدەن بە خۆشی و ئاشتییانە لە یەك جیا ببینەوە و ببین بە هاوپەیمانی بەهێز بۆ یەكتر. بە لەیەك گەیشتن و رێككەوتن لەگەڵ عێراق حەساسیەتی وڵاتانی ناوچەكەش كەمتر دەبێت. هەروەها لەگەڵ وڵاتانی دیكەش قسە بكرێت. گرنگ ئەوەیە كە بتوانین وەك گەلێك بە یەك هەڵوێست و یەك بڕیار ئەمە بكەین و بە پێی هەموو یاسا نێودەوڵەتییەكانیش كەس ناتوانێت بڕیاری گەلێك نادیدە بگرێت و ئۆمێدی سەركەوتنی گەلەكەمان بە گەیشتن بە ئامانجەكانی زۆر زیاتر دەبێت.

* هەنگاوهەڵگرتن بۆ چاكسازی سیاسی و حوكمڕانی، پێویستییەكی دیكەی پرۆسەی سەربەخۆیی كوردستانە، ئایا تاچەند بایەخ بەم پرسە گرنگە دراوە و تاچەند هەنگاوهەڵگرتن بۆ چاكسازی دەبێتە فاكتەرێك بۆ ئەوەی باشتر خەڵكی كوردستان بەشداری لە پرۆسەی سیاسی و پرۆسەی سەربەخۆیی كوردستان بكات؟
- سەقامگیری سیاسی لە كوردستان گرنگە بۆ حوكمڕانییەكی تەندروست، بەڵام پێویستە ئەمە لەبەرچاو بگیرێت كە دەبێت هەموو لایەنە سیاسییەكان گرنگییەكی زیاتر بە بەرژەوەندی باڵای نیشتمانی بدەن و تەنیا بیر لە ململانێی سیاسی و فراوانكردنی پێگەی خۆیان نەكەنەوە. سیستەمی حوكمڕانی پێویستە لە سەر بنەمایەكی درووست بێت، نەك لەبەر ئەوەی لایەنێكی سیاسی را و بۆچوونێكی جیاوازی هەیە، لایەنی تر دژی ئەوە هەڵوێست وەربگرێت. با بە قووڵی بیر لەوە بكرێتەوە كە كام سیستەمی حوكمڕانی زیاتر خزمەتی خەڵكی كوردستان دەكات و زیاتر دەرهاوێشتەی حەزی خەڵكی كوردستانە. تا خەڵك زیاتر بە شێوەیەكی راستەوخۆ لە وەرگرتنی بڕیاردا بەشدار بن، بێگومان كاریگەرییان لە سەر بڕیارەكان زیاتر دەبێت، بەتایبەتی لە بابەتی سەربەخۆیی هیچ ئالتەرناتیڤێك ناتوانێت جێگرەوەی بەشداری راستەوخۆی خەڵك بێت.

* بەڕێزتان وەك راوێژكاری ئەنجومەنی ئاسایشی نیشتمانی كوردستان، لە سەرەتای دەستپێكی شەڕی داعشەوە، وەك پێشمەرگە لە سەنگەرەكانی پێشەوە بوون، دیارە ئەمەش وەك باس دەكرێت لەبەر ئەوە بووە، شەڕی تیرۆریستانی داعش بۆ پێشمەرگە شەڕێكی تازە بووە و هێندەی ئەنجومەنی ئاسایش ئەزموونی لە شەڕی دژی تیرۆریستان نەبووە، بەڵام بە ماوەیەكی كورت توانیتان هاوكاری پێشمەرگە بن بۆ ئەوەی لەگەڵ ئەم شەڕە رابێن. ئایا تاچەند بۆ ئێوە قورس بوو، هاوشانی پاراستنی ئاسایش و سەقامگیری ناوخۆیی كوردستان، ئەم ئەركەشتان كەوتە سەرشان؟
- وەك هەموو پێشمەرگەیەك و هاووڵاتیانی خاوەن هەڵوێست بە ئەركی خۆمان زانیوە بەشدار بین لە بەرگریكردن لە كوردستان و ئەم ئەركەمان لەسەر شان بووە، بەڵام بە هاتنی داعش بۆ سنوورەكانی كوردستان وەك پێشمەرگە، زۆر لە كادر و ئەفسەر و كارمەندەكانی دەزگاكانمان بەشدارییەكی راستەوخۆی ئەركی بەرگریكردنیان كردووە و دەورێكی كاریگەریشمان بینیوە لە هەماهەنگیكردن لەگەڵ وڵاتانی هاوپەیمانان و پێشمەرگە و بەتایبەتی لە ئاراستەكردنی هێرشە ئاسمانییەكان بۆ سەر دوژمن و گەیاندنی زانیاری ورد و بەپەلە بە پێشمەرگە لەكاتی خۆیدا كە زۆر جار هۆكاری سەرەكی تێكشكاندنی دوژمن بووە. هەروەها بەردەوام لە هەموو وێستگە و پێوەندییەكانماندا لەگەڵ هاوپەیمانەكان باسمان لە پێداویستی چەك و لۆجستیكی و هاوكاری بۆ پێشمەرگە كردووە و بە شانازییەوە توانیومانە بەرهەمی باشیش بەدەست بێنین.

* بە حوكمی ئەزموونی دامەزراوەی ئەنجومەنی ئاسایشی نیشتمانی هەرێمی كوردستان لە شەڕی دژی تیرۆریستان، بەشی زۆری میدیاكانی جیهان بۆ پێداویستی چەك و تەقەمەنی پێویست بۆ پێشمەرگە رای ئێوە وەردەگرن، بەڵام ئەوەی لە ئێوە گوێمان لێبووە، هەتا ئێستاش هێزی پێشمەرگە بەو ئاستە پڕچەك نەكراوە كە بەپێی پێویست و بە بەردەوامی ئیدارەی شەڕێكی ئاوا گەورە لەگەڵ تیرۆریستان بكات، ئایا پێداویستی پێشمەرگە لە ئێستادا چین؟
- پێشمەرگە وەك هێزێكی نیزامی و رێكخراو و خاوەن ئەزموون پێویستی بە هەموو چەكێكە كە هێزە مودێڕنەكان هەیانە. تا چەكی باشتر و قورستر و كاریگەرتر لەبەر دەستی پێشمەرگە بێت، پێشمەرگە سەركەوتووتر دەبێت و زیانی كەمتر دەبن. لەو چەكانەش تانك و تۆپی دوورهاوێژ و هەلیكۆپتەر و چەكی قورس و زرێپۆش و جلوبەرگی باش و عیتادی هەمەجۆرە. بەڵام ئێستا پێداویستیی هەرە سەرەكیی پێشمەرگە مووچە و میزانییەی گونجاوە كە بەداخەوە نەبوونی بودجە كاریگەری كردووەتە سەر دۆخەكە و ئەگەر پێشمەرگە و بیر و باوەڕی بەهێزی نەبێت، هیچ هێزێك بەرگەی ئەو دۆخە نالەبارە ناگرێت. بۆیە هیوادارم بژێوی ژیانی پێشمەرگە و دابینكردنی مووچە بۆ خۆیان و ماڵ و منداڵیان بە زووترین كات چارەسەر بكرێت.

* هێزەكانی دژەتیرۆری سەر بە ئەنجومەنی ئاسایشی نیشتمانی هەرێمی كوردستان، توانییان بە سەركەوتوویی لەگەڵ هێزە تایبەتەكانی ئەمریكا، بۆ یەكەمین جار لە شەڕی دژی داعش، ئۆپەراسیۆنێكی گەورەی هاوبەش لە حەویجە ئەنجامبدەن، ئێستاش لە ستراتیژیەتی تازەی ئەمریكا بۆ شەڕی دژی داعش، باس لە ئۆپەراسیۆنی هاوبەش لەگەڵ هێزە لۆكاڵەكان دەكرێت بۆ گۆڕینی ئاراستەی شەڕەكە، ئایا ئەو ئۆپەراسیۆنە هاوبەشەی هێزی دژەتیرۆر و هێزە تایبەتەكانی ئەمریكا، بووە زەمینەیەك بۆ ئەوەی ببێتە بەشێك لە ستراتیژیەتی تێكشكاندنی داعش؟
- بێگومان ئۆپەراسیۆنە هاوبەشەكان كاریگەرییان لەسەر تێكشكاندنی دوژمن و رووخاندنی ورەی دوژمن هەیە. بەڵام لەوەش گرنگتر ئاماژەیە بە توانای هێزە تایبەتییەكانی خۆمان وەك دژەتیرۆر كە لە ئاستێكی زۆر بەرز دەتوانن لە پاڵ هێزە هاوشێوەكانیان لە هێزەكانی ئەمریكا ئۆپەراسیۆنی وا ورد و گرنگ ئەنجام بدەن.

* ئەگەر پرسیارێك سەبارەت بە پارتی دیموكراتی كوردستان بكەین، دیارە ئێستا پارتی دیموكراتی كوردستان شانی داوەتە بەر ئەركێكی مێژوویی گەورە و لە بەرامبەر تەحەددییەكانی ناوخۆ و دەرەوە و ئیقلیمی راوەستاوە. ئایا پێویستە پارتی لەم قۆناخەدا چی بكات، بۆ ئەوەی لە ئاستی ئەم بەرپرسیاریەتییە گەورە و مێژووییەدا بێت؟
- پارتی هەمیشە كوردایەتی كردووە و خۆی بە پارێزەری دەستكەوتە نیشتمانییەكان زانیوە و پێویستە لەم قۆناغەشدا هەموو هەوڵێك بدات بۆ پاراستنی ئەم ئەزموونە و پارێزگاری كردن لە نەتەوە و نیشتمان و هەنگاوی گونجاویش بهاوێژێت بۆ دەستەبەركردنی دەستكەوتی زیاتر و خوێندنەوەیەكی ژیرانەی هەبێت كە لە كام كات و ساتدا چ بڕیارێك بدات و چ هەنگاوێك بهاوێژێت. پارتی هەمیشە سەكۆیەكیش بووە بۆ كۆكردنەوەی هەموو خەڵكی كوردستان و لە یەك نزیك كردنی بیر و بۆچوونی هێزە نیشتمانپەروەرەكان و رێگەی بە سەركەوتنی پیلانی وێرانكەریش نەداوە و ئێستاش ئەركی پارتی و هەموو هێزەكانی نیشتمانپەروەرە كە بەیەكەوە بارودۆخی ئێستای هەرێم بەرەو ئارامی و ئاساییكردنەوە ببەن و هەوڵی بەدەستهێنانی دەستكەوتی زیاتریش بدەن لە هەموو روویەكەوە.

* دواپرسیارمان سەبارەت بە قەیرانی ئابووری و گوزەرانی خەڵكی كوردستانە. ئاشكرایە ماوەی دووساڵە خەڵكی كوردستان قارەمانانە خۆڕاگری خۆیان پیشانداوە لە بەرامبەر ئەم قەیرانە ئابوورییە، هەروەها سەرۆك بارزانی داوای لە حكومەت كردووە هەموو هەوڵێك بخاتە گەڕ بۆ ئەوەی ئەم قەیرانە چارەسەر بكات. پرسیار ئەوەیە ئایا بۆ تێپەڕاندنی ئەم قەیرانە، وێڕای چاكسازییەكانی حكومەت كە دەستی پێكردووە، تا چەند گرنگە دیالۆگێكی راستەوخۆ لە نێوان حكومەت و خەڵك هەبێت، بۆ ئەوەی پێكەوە ئەم قۆناخە سەختە تێپەڕێنین؟
- نزیكبوونی حكومەت لە خەڵك ئەركە و پێویستە خەڵك متمانەی بە حكومەت هەبێت و بە هی خۆی بزانێت. پێموایە كێشەیەكی سەرەكی ئەوەیە كە خەڵك لە هەموو شت ئاگادار نییە. حكومەت كەمتەرخەم بووە لەوەی بەراشكاوی هەموو كێشە و گرفت و بەرنامەی ئابووری خۆی وەك پێویست بە خەڵك بگەیەنێت. پێویستە حكومەت لە داڕشتنی سیاسەتی ئابووری رای خەڵك بە هەند وەربگرێت. چارەسەركردنی گرفتەكانیش لەوەوە دەستپێدەكات كە دان بە هەڵەكاندا بنرێن و سیاسەتی ئابووری حكومەتی ئێمە لە سەرەتاوە دەكرا باشتر بێت و تەنیا پشت بە كەرتی نەوت و غاز نەبەستێت و كەرتی كشتوكاڵی و پیشەسازیش پێش بخات و ژێرخانێكی بەهێزی ئابووری دروست كرابا. ئێستاش هاوكات لەگەڵ ئەو هەوڵە چاكسازییانە كە پێویستە بە بنبڕكردنی گەندەڵی دەستی پێبكرێت، زۆر گرنگە كە سیستەمێكی ئابووریی بەهێز لەسەر بنەمایەكی زانستی دروست بكرێت و خەڵك نەك تەنیا ئاگادار بێت، بەڵكو بەشدار بێـت.