قسەكردن لەسەر هەلومەرجی نێودەوڵەتی و دووبارە رێكخستنەوەی رۆژهەڵاتی ناوەڕاستە، لە هەمانكاتدا 100 ساڵی رێك بە سەر نەخشەی سایكس پیكۆ-دا تێدەپەڕێت و نەخشەكەش بە شێوەیەكی كردەیی لە بەشی زۆری ناوچەكە كۆتایی هاتووە، سەبارەت بەم پرسە و پرۆسەی سەربەخۆیی كوردستان، هیوا ئەحمەد مستەفا ئەندامی ئەنجومەنی سەركردایەتی پارتی كوردستان بەمجۆرە وەڵامی پرسیارەكانی گوڵان-ی دایەوە.

هیوا ئەحمەد مستەفا بۆ گوڵان:نەخشەی سایكس پیكۆ بە كردەیی لە عێراق و سووریا كۆتایی هاتووە



* ئەمساڵ 100 ساڵی رێك بە سەر رێككەوتنی -سایكس پیكۆ-دا تێدەپەڕێت، ئەو رێككەوتنەی كە سەرلەنوێ نەخشەی رۆژهەڵاتی ناوەڕاستی داڕشتەوە و واقیعێكی داسەپاوی بە سەر كورداندا سەپاند و كوردستانی پارچەپارچە كرد. لە ماوەی ئەم 100 ساڵە كورد قوربانیی ئەم رێككەوتنە بووە، بەڵام ئێستا واقیعێكی تازە هاتۆتە پێشەوە و هەموو جیهان گەیشتۆتە ئەو قەناعەتەی دەبێت ئەم -سنوورانە چاوی پێدابخشێندرێتەوە، لە ئێستاشدا كوردستان بە هۆی سەركەوتنەكانی پێشمەرگەوە هاوسۆزییەكی گەورەی نێودەوڵەتی بۆ درووستبووە. ئایا چی بكەین بۆ ئەوەی بتوانین لەم هاوكێشە تازەیەدا و ئەو هاوسۆزییە گەورەی بۆ كورد درووست بووە، بیگۆڕین بۆ پرۆسەی بونیادنانی دەوڵەتی كوردستان و سڕینەوەی ئەو غەدرەی كە رێككەوتنی سایكس پێكۆ لە كوردی كردووە؟
- پێشمەرگە بەدەر لە كاریگەری سەربازی و دابینكردنی ئاسایش و ئارامی بۆ خەڵكی كوردستان، لە بەرەنگاربوونەوەی ئەو هێزەی پێی دەوترێت (داعش) رۆڵێكی دیكەی گێڕاوە، كە هەتا مێژووی كوردستان هەیە، دەبێ خۆی بە منەتبار و قەرزداری ئەو هێزە بزانێ. چونكە پێشمەرگە بوو بە ئەو هێزەی توانی گوڕ و تەوژمی سیاسی و دیپلۆماسی بە دۆزی رەوای گەلی كوردستان ببەخشێ. ئەوە ناوی پێشمەرگەیە، بووە بە چەمك، بووە بە زاراوەیەكی وێردی سەر زار و زمانان، نەك هەر لەسەر ئاستی كوردستان و عێراق و ناوچەكە، تەنانەت سنوورە نێودەوڵەتییەكانی تێپەڕاند و لەسەر ئاستی جیهان ناوەندە سیاسی و رۆشنبیری و میدیاییەكان و سایتەكانی ئەنتەرنێت و تۆڕە كۆمەڵایەتییەكان -ئەوانەی بە سۆشیال میدیا ناو دەبرێن- لە هەموو ئەو ناوەندانە خۆی ناساند. ئێستا لە وڵاتانی ئەوروپا لە شەقامەكان كە وترا: پێشمەرگە، دەزانرێ باسی سوپایەك دەكرێ كە كورد و كوردستانییە و شەڕدەكات لەگەڵ هێزێك كە لە لووتكەی ناشیرینترین رەفتاری مرۆڤایەتیدایە لە مێژوودا، ئەویش داعش ـە. جگە لەوەی پێشمەرگە بووەتە كاراكتەرێكی سەرەكی و بكەرێكی بزۆز و چالاك لە بەرەنگاربوونەوەی داعش لەم سەردەمە هاوچەرخەدا، رۆژێكیش دادێت شێوازی شەڕی پێشمەرگە لە ناوەندە سەربازییەكانی دنیا لەسەر ئاستی كۆلیژەكان دەخوێندرێت و دەبێت بە بابەتی مەشقی سەربازی. شێوەی سەركەوتنی هێزی پێشمەرگە لە چۆنیەتی ئازادكردنەوەی شەنگال لە ژێر فەرماندەیی رێزدار مسعود بارزانی-دا زۆر سەرنجی ناوەندە سەربازییەكانی جیهانی بۆلای خۆی راكێشاوە و چەندین دامودەزگای سەربازی سەرقاڵی توێژینەوە كردووە و وانە و پەند و سوودی لێ وەردەگرن. بۆیە ناكرێ دەوڵەتانی وەك (ئەمریكا، ئەڵمانیا، فەرەنسا) ناوەندە سەربازییەكانیان سەرسام بن بە شێوازی شەڕی پێشمەرگە و هەست بكەن وانەیان لێ فێردەبن، بەڵام ئامادە نەبن پشتیوانی لۆجیكی و ورەیی ئەو هێزە بكەن، خۆ ئەگەر كردیان، ئەوە لەوێ بڕیارەكە گەیشتۆتە ئۆرگان و ناوەندێكی دیكە، كە بڕیاری سیاسییە. ئێمەش بۆ كاری ستراتیژی خۆمان ئیشمان بەو بڕیارە سیاسییەیە، كە پڕۆژەی هەڵوەشانەوەی نەخشەی رێككەوتننامەی -سایكس پیكۆ -یە، لانیكەم لەسەر هەرێمی كوردستان. بۆیە لە وەڵامی ئەو پرسیارەی كە چی بكەین بۆ كەڵك وەرگرتن لە هاوسۆزی بۆ پێشمەرگە؟ دەكرێت بڵێین: پێویستە كارێكی وابكەین هێزەكانی پێشمەرگەی كوردستان تەنیا زمانی سەربازی نەزانن و بە فكر و هزری سیاسی و رۆشنبیری لەگەڵ شاندی ئەو وڵاتانەی كە دێن بۆ كوردستان گفتوگۆ بكەن، یان ئەو شاندە سەربازییانەی دەڕۆن بۆ خۆرئاوا و یەكێتی ئەوروپا، نابێ هەر بە زمانی سەربازی بدوێن، بەڵكو پێویستە ئامانج و تەوەرە سەركی و گرنگەكانی وتارەكانیان بە (نووسین) لە سەركردایەتی هەرێمی كوردستان بۆ رێكبخرێت، قورسایی پەیامەكە پێش ئەوەی سەربازی بێت، دەبێت سیاسی بێت، ئەوجار داوای ئەوە بكرێ كە پێشمەرگە پێویستی بە پشتیوانی سەربازی خۆرئاوا و جیهان هەیە، بۆ ئەوەی كوردستان ببێتە خاوەنی دەوڵەت، تا خۆی و دەوروبەر لە هەڕەشەكانی داعش بپارێزێت.
* هاوكات لەگەڵ ئەم هاوسۆزییە نێودەوڵەتییەی بۆ كوردستان درووست بووە، گرنگە كورد ئەم فرسەتە بقۆزێتەوە و بە زمانێكی راشكاو لەگەڵ دەوڵەتانی رۆژئاوا قسە بكات و بیریان بێنێتەوە ئەوە غەدری ئەوان بووە كە بۆ ماوەی پتر لە سەدەیەكە مێژووی ئەم نەتەوەیەی خەڵتانی خوێن كردووە، رای گشتی رۆژئاوا بورووژێنێت بەوەی ئێستا نەك كاتی ئەوەیە دان بەو غەدرەدا بنرێت، بەڵكو كاتی ئەوەیە ئەو غەدرە قەرەبوو بكرێتەوە. ئایا ئەگەر هەنگاوێكی لەمجۆرە دەستپێبكەین، تاچەند دەتوانین كاریگەری لەسەر حكومەتەكان و رای گشتی رۆژئاوا درووست بكەین؟ ئایا تاچەند لە هەلومەرجێكی هاوشێوەی ئێستادا لە پرۆسەیەكی لەوجۆرەدا سەركەوتوو دەبین؟
- پەنابەرانی كوردستان لە رۆژئاوا ئەوەی پێی دەوترێت جالیەی كوردی، یان هەرچی ناوی بنێین، ئەوانەی ئێستا لە دەرەوە ژیان دەبەنەسەر، زۆر گرنگە لایەنی نەرێنی كوردستان وەلابنێن و لایەنی باش و گەشی كوردستان و هەرێمەكەمان بەرنە پێش و برەوی پێ بدەن. زۆر گرنگە لە بازاڕەكان، كارگەكان، شوێنە گشتییەكان، ناوەندە رۆشنبیری و ئەكادیمییەكان و ئەو شوێنانەی كوردەكانی دەرەوە كاری خۆیانی تێدا رایی دەكەن، لەگەڵ خەڵكی بیانی لە وتووێژدا بن و باسی مێژووی غەدرلێكراوی كوردستان بەدەست ئەنجام و ئاكامەكانی -سایكس پیكۆ-وە بكەن، كە جگە لە نەگبەتی بۆ گەلانی رۆژهەڵاتی ناوەڕاست و ئاشووب و فیتنەكاری بەرهەمێكی دیكەمان لێ نەچنیوەتەوە. وەك دەبینن ئێستا جیهان بەگشتی باجەكەی دەدات. بەڵام لەو حاڵەتانەدا و لە ئێستاشدا میدیای كوردستان، سەتەلایتەكان و رۆژنامە و تۆڕە كۆمەڵایەتییەكان ئەركێكی گرنگییان دەكەوێتە ئەستۆ، ئەویش وشیاركردنەوەی خەڵكی كوردستانە، تا ئەوانەی لە دەرەوەی وڵات دەژین، زانیاری گشتییان هەبێ، بۆ ئەوەی هەموومان وابكەین دنیای دەرەوە جموجووڵ و چالاكی و بزاوتی سیاسی و رۆشنبیری زۆرتری تێ بكەوێ تا داوای پشتیوانی لە گەلانی دنیا بۆ سەربەخۆی كوردستان بكەین. ئەو بزاوت و چالاكییانە بە میتینگ و خۆپێشاندانی هێمنانە و دروشم و لافیتە و دابەشكردنی كارتی جۆراوجۆر لەناو بازاڕ و شەقامەكانی وڵاتانی ئەوروپا بێ بەرامبەر بكرێن، لەناو كارت و مەدالیای بچووكی جوان، داوا بكرێ كوردستان پێویستی بە پشتیوانی ئێوەیە بۆ ئەوەی ببێتە خاوەنی سەروەری خۆی، كە مەبەست لێی ئەو كوردستانەیە كە پێشمەرگەی درووست كردووە.
* لە كۆمەڵگەی دیموكراتیدا هەموو سیاسەتێك لە هەلومەرجی ناوخۆییەوە دەستپێدەكات. بەداخەوە لە ئێستای واقیعی سیاسیی ناوخۆیی كوردستاندا، هەلومەرجی سیاسی بەو ئاستە لەبار نییە كە بڵێین هیچ كێشەیەك لەنێوان لایەنە سیاسییەكاندا بوونی نییە، ئەمە فەرزی دەكات لە سەرمان كە هەنگاوی یەكەم بۆ هەر بڕیار و هەنگاوێك، رێكخستنەوەی نیوماڵی كورد بێت، ئایا چی بكەین بۆ ئەوەی زەمینەی سیاسیی ناوخۆی كوردستان بۆ بڕیارێكی چارەنووسسازی لەو جۆرە لەبار بكەین؟
- راستییەكی تاڵ و هۆكارێكی ناخۆش و ئاستەنگێكی گەورە هەیە و نابێ نكۆڵی لێ بكەین، كە بووەتە رێگر لە بەردەم بەرەوپێشچوون لەم دۆخەدا، ئەویش ناڕێكی و ئاڵۆزی ناوماڵی خۆمانە وەك هەرێمی كوردستان. ئەم پەرت و بڵاوی و ناسەقامگیرییە سیاسییەی هەرێمی كوردستان هەل و مەرجێكی درووستكردووە، دەست و قاچی دیپلۆماسیەتی كوردی لە زۆر بواردا شەتەك داوە و گرفتی زۆری بۆ درووستكردووە. ئێمە پێشتر باسمان كرد، بۆ بونیادی دەوڵەتی كوردی نابێت رەوەندی كوردی لە ئەوروپا و خۆرئاوا بەگشتی لەبیر بكەین، بەداخەوە لە بەدبەختی و پەرتەوازەیی ناوماڵی كوردی لە جیاتی ئەوەی بە یەك دەنگ و یەك رەنگ بۆ سەربەخۆیی كوردستان خۆپێشاندان بكرێ، كەچی دەبینین هەوڵ و كۆشش هەیە بۆ ئەوەی لە پەرلەمانی ئەوروپا و باڵیۆزخانە و كونسوڵیەتەكان پێچەوانەی ئەوە بخەنەڕوو، واتە هەنگاو بۆ پەرتەوازەیی ناوماڵی كورد دەهاوێژرێت، هەوڵدەدرێت پێشمەرگە وەك میلیشیا بناسێندرێت، بەوەش ئەوروپییەكان تێدەگەن كورد یەك دەنگ و یەك رەنگ و خاوەن یەك وتاری سیاسی نییە.! ئەوە زۆر زەرەرمان لێ دەدات.دەبێ ئێمە پێش هەر كارێك گرفتە ناوخۆییەكانی هەرێمی كوردستان چارەسەر بكەین، ئەوجار دەتوانین هەنگاوی گەورە بهاوێژین، بە پێچەوانەی ئەوە ناتوانین ئامانجە سیاسیە گرنگ و گەورەكان بپێكین، پێویستە هەموو شتەكان چاك بكرێن، پەرلەمان وەگەڕ بخرێتەوە و حكومەت كارەكانی خۆی بكات، ئەوەش بە رێككەوتنی تازە دەكرێ، چونكە ئەوانەی پێشتر سەركەوتنیان بەدەست نەهێنا. باشترە كۆبوونەوەكان دوو قۆڵی ئەوجار سێ قۆڵی و چوار قۆڵی و زیاتر و زیاتر بكرێن. لە هیچ شتێكدا نەبوون نییە، ئەوەی پێی دەوترێ (هەرگیز) ئەوە لە سیاسەتدا جێی نابێتەوە، یان نابێ سیاسەت بكەین، یان نابێ خاڵی كۆتایی دابنرێت، چونكە گرفتمان بۆ درووست دەكات. مەبەستی من لەوەیە، ئەگەر بەڕاستی خاوەنی پڕۆژەیەكی دەوڵەتسازی بین، ئەگەر بەنیازیش نەبین، ئەوە هەر چۆن بێ دەتوانین لەگەڵی رابێین. لە پڕۆژەی دەوڵەتخوازیدا چەندی بكرێ و بە هەر شێوەیەك بتوانرێ دەنگەكان یەك بخرێن و رەنگەكان تێك بخزێن و ركابەرەكان كەمتر بكرێنەوە، هێندە لە ئامانجەكان نزیكتر دەبینەوە، بۆ ئەوەش دەبێ یەكەم هەنگاو لە راگەیاندنەكانەوە دەست پێبكەین، ئەگەر لەوێ كۆنتڕۆڵی زمانی خۆمان نەكەین، جەستە و دەروونمان لەگەڵ یەكتر رێك نایەنەوە و ئاشتی و پێكەوە كاركردن سەرناگرێ، لە پرۆسەیەكی ئاواشدا ناتوانین كارەكان بەبێ ئاستەنگی گەورەی ناوخۆیی بەڕێ بكەین كە دوور نییە لەباربردنێكی تری خەونی كورد و كوردستان بەدوای خۆیدا بێنێ. ئێمە سێ رێگەمان لەبەردەمە، یان تەنازولات لە ئاستی یەكتر بكەین و بگەینە رێككەوتنێكی تازە، یان رەوشەكە ئاوا دەڕوات تا هەڵبژاردنی داهاتوو ئەنجام دەدرێ، یان ئەو چەق بەستوییە بەرەو دوو ئیدارەییەكی نەخوازراومان دەبات.
* لایەنێكی دیكە لە پرۆسەی دەوڵەتسازی كە رووبەڕوومان دەبێتەوە، ئەو ژێرخانە ئیداری و سیاسیەیە كە دەبێتە بناخە بۆ ئەوەی ئەو دەوڵەتەی داهاتووی لەسەر رادەگەیەندرێت، دەبێت ژێرخانی ئیداری و سیستمی حوكمڕانی سەرلەنوێ رێكبخرێتەوە و پرۆسەیەكی گۆڕانكاری و چاكسازی گرنگ دەستی پێبكرێت. ئایا پرۆسەی گۆڕانكاری و چاكسازی وەك توخمێك لە نەخشەی رێگا تاچەند بۆ پرۆسەی سەربەخۆیی گرنگە و تاچەند پێویستی بە ئیرادە و بڕیاری بوێرانە هەیە؟
- حكومەتی هەرێمی كوردستان كەوتۆتە قەیرانێكی زۆر گەورەی دارایی. پەندێكی كوردی هەیە دەڵێت: «سەد كراسی پاك لەبەر بكەی، وەك كراسێكی پیس سەرنجراكێش نابێت»، حكومەت كەمتەرخەمی و بێ بەرنامەیی هەبووە، بەڵام بەشێكی لە چاكە و میهرەبانی و سۆزی حكومەت بووە بۆ خەڵكی خۆی، لەوەی خەڵك دابمەزرێنێ بۆ ئەوەی تا راددەیەك ژیانیان ببووژێنێتەوە، بەڵام ئەمڕۆ بەسەریدا شكاوەتەوە، جاران چەندی بە شان و باڵی حكومەتمان هەڵدابایە، زۆر پێمان ئاسایی بوو لە شان و دەست و پەنجەمان خۆش دەهاتەوە، ئەدی ئێستا خێرە وا نین، رەوشەكە چی لێ گۆڕاوە؟ هەر ئەوانەی تا دوێنێ سوودمەندی ئەوەڵ و ئاخیر بوون ئێستا ئەوان چۆن بوو، وا بوون بە خاوەن ماڵ و دز خاوەن ماڵی گرت؟ كەمترین بابەت لەسەر بڕینی بوودجە و مووچەی هەرێمی كوردستان لەلایەن حكومەتی عێراقەوە باس دەكرێت، لەكاتێكدا بەئاشكرا دەستیان خستۆتە ناو بینەقاقای خەڵكی كودستان و دەیانەوێ لە برسان بمانكوژن، كەچی هەندێ لایەنی سیاسی هێشتا ئەوتاوانە گەورەی عێراق پەردەپۆش دەكەن، ئەوانەی هەوڵ دەدەن خەڵك دژی حكومەتی هەرێم هان بدەن، ئەدی بۆ ئامادە نەبوون یەك رۆژ بێنە سەرشەقام دژی بەغدا؟ لە كاتێكدا دەبوو بە خۆپیشاندانی كوردستانییان دژی نان بڕینی خەڵكی كوردستان بەغدامان بهەژاندایە.
لێرەدا دەبێت پرسیار بكەین ئایە هەر حكومەتی هەرێم تووشی گرفتی دارایی بۆتەوە؟ ئایا شكان و دابەزینی نرخی نەوت لە 110 دۆلارەوە بۆتە 25 دۆلار هەر حكومەتی هەرێمی گرتۆتەوە؟ یان هۆكاری دابەزینی نرخی نەوت هەڵەی حكومەتی هەرێمە؟ ئەی ئەگەر وڵاتانی دیكەشی گرتۆتەوە، لەوێش خەڵك تا چەند نیگەران بوون و تا چ رادەیەك كاری كردۆتە سەر ژیانیان؟ ئایا حكومەتەكانیان چۆن رووبەڕووی گرفتەكانیان بوونەتەوە؟ ئەدی دەكرێ ئەو رەوشە تا چەند درێژە بكێشێ؟ ئایا حكومەت هیچ پلانی چارەسەری لایە؟ ئەگەر هەیەتی پلانەكە چۆنە و ئەگەر نەیبێ چی روودەدات؟ ئایا ئەوەی ئەمڕۆ دەتوانرێ بكرێ، سبەی دەتوانین بیكەین، هەر وەك ئەوەی لەدوێنێدا دەتوانرا بكرێ و نەمانكرد و ئەمڕۆ باجەكەی دەدەینەوە؟ بەشێك لەو وەڵامانە لای حكومەتە و بەشێكیشیان دەتوانین لەسەری بدوێین. حكومەتی هەرێم خەتایەكی لە داشكاندنی نرخی نەوتدا نییە، بەپێچەوانەوە پێی نیگەرانە و تەنیا وڵاتی ئێمەش تووشی ئەم قەیرانە داراییە نەبۆتەوە، زۆر وڵاتان دووچاری قەیرانی دارایی بوون و خەڵكەكەشیان نیگەرانن لەو ژیان و گوزەرانەی كە بەسەری دەبەن. لێرەشدا دەبێ حەق بدرێ بە هاووڵاتی، چونكە هاووڵاتی كاری بەوە نییە ئەم قەیرانە چەند وڵاتی گرتۆتەوە، هاووڵاتی پێویستی بە ژیان و گوزەران و ئەمن و ئاسایشە، پێویستی بە جێگیربوونی ژیانی خۆیەتی تا بزانێ ئایندەی چۆن دەبێت. هاووڵاتی دەیەوێت كاتێك ئەندامێكی خێزانەكەی نەخۆش دەكەێت، پارەی هەبێت بیبات بۆلای پزیشك و چارەسەری بكات، یان مووچەخۆرێك نەتوانێ كرێی خانووەكەی بدات، چۆن ژیان بەسەر ببات؟ ئەوانە بەڕاستی گرفتن. بەڵام من دەڵێم: دوو ساڵ ژیانكردن لە برسێتی و نەبوونیدا لە دوو كاتژمێر ژیانی ناو شەڕ و ئاژاوە و بگرە و بەردە و چڕەدووكەڵ و كوشت و كوشتار ماڵوێرانی و شەڕی ناوخۆ و ئاوارەبوونی هەندەران باشترە، بەتایبەتی لەو سەرماو سۆڵە و بەستەڵەكەی زستاندا. خەڵكی سووریا خۆپێشاندانیانكرد و ئەنجامەكەی دیارە چۆنە، یەك پارچە بۆتە وێرانە. هەر شەڕ و ئاژاوەیەك تووشی گەورەترین مەترسیمان دەكات كە وەك خۆكوشتن وایە، داعش زۆر نزیكە لێمان! پیشمەرگەكانمان نابێ نیگەرانی ئاسایشی ناو شارەكان بكرێن، ئەگەرنا كاریگەری لەسەر بەرەنگاربوونەوەكانیان دەكات. یەك ملیۆن و 800 هەزار ئاوارە لە كوردستانن، كەس نازانێ ئەجیندای ئەوانیش چی تێدایە؟ بابەتی ورووژاندنی خەڵك زۆر ناسك و هەستیارە، نابێ راگەیاندنەكان هەروا بەئاسانی خەڵك هان بدەن چونكە میللەتەكەمان تووشی مەترسیی گەورە دەكەنەوە، دوایی هەر ئێمە نابین وڵاتانی دەوروبەریش دەگرێتەوە. هاوكات زۆر پێویستە حكومەتی هەرێم لەمەولا بە شێوازێك كاربكات كە چیتر نەهێڵێ كۆمەڵێك بازرگانی گەورە سەروەت و سامانی كوردستان بە هەدەر بەرن و لە رۆژگارێكی ئاوا سەخت و نالەباریشدا هیچ هەڵوێستیان نەبێت و ئامادە نەبن هاریكاری حكومەتی خۆیان بكەن، بۆ ئەوەی ژیان و گوزەرانی(3-4)مانگی رابردوو، یان داهاتوو بە پێدانی مووچە ئەگەر بە قەرز و قازانجیش بێ بۆ فەرمانبەران دابین بكەن. گرنگە حكومەت بەپەلە پلان بۆ بووژاندنەوەی كەرتی كشتوكاڵ و سەرچاوەكانی مەڕ و ماڵات و پەلەوەر و گەشتوگوزار و كەرتی پیشەسازی بە كردەوە دابنێت. چونكە ئەو وڵاتانەی پشت بە یەك سەرچاوەی داهات دەبەستن، كە (نەوت)ـە، ئەگەر تا ئێستاش وایان لێ نەهاتبێ، لە ئایندەدا حاڵیان وەك هی ئێمەی لێدێت.
بەداخەوە هەندێ پارتی سیاسی دەستیان بۆ كۆمەڵێك بابەتی زۆر هەستیار برد بە پاساوی (یاسای سەرۆكایەتی هەرێم) كە ئامانج تێیدا دەرپەڕاندنی پارتی دیموكراتی كوردستان بوو، ئەگەر ئەوە نەبوایە خودی دامەزراوەی سەرۆكایەتی هەرێم دەبوو بە هۆكار و پاڵپشتێكی باش بۆ ئەو پڕۆژە چاكسازییانەی پەرلەمانی كوردستان و حكومەتی هەرێم بانگەشەیان بۆی دەكرد، رەوشە سیاسییەكەش بەو چەقبەستووییە نەدەگەیشت.