دوای ئەوەی رۆژی یەكشەممە بەهۆی رووداوێكی هاتووچوو سێ كەسایەتی وەرزشی دیاری كوردستان كۆچی دوایان كرد، كە هەریەكە لە ناوبژیوانی نێودەوڵەتی پێشوو سەڵاح محەمەد كەریم و سەرۆكی پێشووی یەكێتی گۆرەپان و مەیدانی عێراق د.عاصی فاتح وەیس و یاریزانی پێشووی تێنسی سەرمێز و سەرۆكی یەكێتی تێنسی سەرمێزی لقی سلێمانی ئاسۆ دەروێش بوو.
كۆچی دوایكردنی سەڵاح محەمەد كەریم كاردانەوەیەكی زۆری هەبوو لە نێو عێراقدا، كە تیاییدا وەزیری وەرزش و لاوانی عێراق عەبدولحوسێن عەبتان پرسنامەی سەرەخۆشی ئاراستەی خانەوادەی كۆچكردوو كرد و گوتی: عێراق كەسایەتییەكی دیاری وەرزشی لە بواری ناوبژیوانی و یاساكانی لە دەستدا، چونكە ناوبراو خزمەتێكی زۆری بواری وەرزشی عێراق-ی كردووە.
یەكێتی تۆپی پێی عێراق بەهەمان شێوە هاوخەمی خۆی راگەیاند و بریاری دا ئەمرۆ سێشەممە كاتژمێر 4ی ئێوارە پرسە بۆ خوالێخۆشبوو لە شاری بەغداد لە هۆڵی داخراوی شەعب ئەنجام بدات، چونكە خزمەتێكی زۆری بواری تۆپی پێی عێراق-ی كردووە.
هاوكات لێژنەی ئۆڵۆمپی عێراق پرسەی سەرخۆشی ئاراستەی خانەوادی خوالێخۆشبوو كرد و گوتی: خانەوادەی وەرزشی عێراق و تۆپی پێی عێراق كەسایەتیەكی دیاری بواری ناوبژیوانی لە دەستدا.
وهەروەها زۆربەی ناوبژیوانانەكانی پێشوو و ئێستا هاوخەمی خۆیان لەسەر كۆچكردنی سەڵاح محەمەد كەریم راگەیاند و تەئكیدیان لەوە كردووە، كە خوالێخۆشبی خزمەتێكی بەرچاوی بواری وەرزش-ی عێراق كردووە.
لە كوردستانیش كۆچی دوایكردنی ئەم سێ كەسایتیە وەرزشیە دەنگدانەوەی زۆری هەبوو، یەكێتی تۆپی پێی كوردستان و لێژنەی ئۆڵۆمپی كوردستان و یانەكانی هەولێر و دهۆك و سلێمانی و زێرەڤانی هاوخەمی خۆیان راگەیاند و هەروەها زۆربەی یانەكان و یەكێتیە وەرزشیەكانی كوردستان پرسە و سەرەخۆشی خۆیان ئاراستەی هەر سێ خانەوادەی كۆچكردوو كرد.
رێبین رەمزی