دوای ئەوەی یارییەكانی هەفتەی یەكەمی خولی نایابی عێراق بۆ تۆپی پێی ئەنجامدرا، لە چەند یارییەك چەند كێشەیەك سەبارەت بە ئەنجامدانی گۆرانكارییەكان، كە تیاییدا لە یاری هەولێر و ئەمانە بەغداد یانەكان چوار گۆرانكاریان ئەنجامدا و لە یاری دهۆك و نەفتی جنوب هەمان كێشە دووبارە بووە و لە یاری مینا و زاخۆ، یانەی مینا نارەزایی دەربری سەبارەت بە ئەنجامدانی سێ گۆرانكاری و رێگەری كردنیان لە لایەن ناوبژیوانی چوارەم لەسەر ئەنجامدانی گۆرانكاری چوارەم، دوای تەواوبوونی یارییەكەی هەولێر و ئەمانە بەغداد، یانەی میوان نارەزایەكی پێشكەش بە یەكێتی تۆپی پێی عێراق كرد سەبارەت بە بابەتە.
لەمباریەوە عەلی جەبار جێگری سەرۆكی یەكێتی تۆپی پێی عێراق گوتی: داوا لە گشت یانە بەشداربووەكانی خولی عێراق دەكەین، كە لە یارییەكانی هەفتەی دووەمی خولی نایابی عێراق پابەندی رێنماییەكانی یەكێتیەكە و لێژنەی پێشبركی یەكێتی تۆپی پێی عێراق بن، كە دەبێت لە هەر یارییەك سێ گۆرانكاری ئەنجام بدرێت و هەر یاریزانێك سێ كارتی زەرد وەربگرێت یارییەك رادەگیریت.
سەبارەت بە رووداوەكانی ئەم هەفتەیە بە تایبەتی نارەزایی یانەی ئەمانە بەغداد، عەلی جەبار گوتی: ئەمە هەڵەی سەرپەرشتیار و دەستەی ناوبژیوانی یارییەكەیە، چونكە ئەوان زانیاریان لەسەر گۆرانكاری نوێیەكانی لێژنەی پێشبركی و لێژنەی ناوبژیوان سەبارەت بە خولی عێراق نەبوو بۆیە ئەنجامی یارییەكە وەكو خۆی دەمینێتەوە و هیچ گۆرانكارییەك ئەنجام نادرێت.
رێبین رەمزی