کچانى ئافرۆدێتى نوێنەرى کوردستان لە خولى تۆپى دەستى عێراقدا بەیەکەمى کۆمەڵەکەیان سەرکەوتنیان بۆ قۆناغى پێش کۆتایى مسۆگەر کرد.
ئەمرۆ پێنج شەممە لە هۆڵى (حەمزە نورى) لەشارى حلەو لەسێ یەم رۆژى پاڵەوانێتى تۆپى دەستى کچانى یانەکانى عێراقدا و لەکۆمەڵەکەى خۆیاندا، کچانى یانەى ئافرۆدێتى تاکە نوێنەرى کوردستان بەرامبەر بە فەتاتى نەجەف یاریان کرد کەپێنج لەیاریزانەکانى ئەو یانەیەى شارى نەجەف کوردن و لەیانەى ئافرەتانى هەولێرەوە بۆ ئەم پاڵەوانێتیە روویان کردۆتە ئەو یانەیە، لەیارییەکەداو سەرەتا ئافرۆدێت لە گۆڵ تۆمارکردن دەست پێش خەربوو، بەڵام کچە هەولێرییەکان بەئەزموونى زیاترى خۆیان و بەبەرگى نەجەفەوە جڵەوى یارییەکەیان وەرگرتەوەو لەئەنجامدا 15 بە 7 گۆڵ لە نوێنەرەکەى کوردستانیان بردەوە، بەڵام ئەو بردنەوەیە تەنها پلەى دوەمى کۆمەڵەکەى پێ بەخشین و لەبەرامبەریشدا ئافرۆدێت بە یەکەمى کۆمەڵەکەى گەیشتە قۆناغى دوەم و پێش کۆتایى خولەکە.
بەو شێوەیە کچانى ئافرۆدێتى سلێمانى رۆژى هەینى و لەیارى پێش کۆتایدا بەرامبەر بە شەبابى بەغداد دەجەنگێت و فەتاتى نەجەف و یانەى شورتەش بەیەک دەگەن، کەلە ریزەکانى یانەى شورتەشدا دوو کچە کوردى ترى شارى هەولێر یارى دەکەن .
جێى باسە بەهۆى بەهێزى و بەرکەوتنى زۆرى یاریزانەکانى بەرامبەرەوە، چاوان ێەلاحى یەکێک لەباشترین یاریزانەکانى ئافرۆدێت دوچارى پێکان هات و بەناچارى یاریگاى جێ هێشت و نەیتوانى یارییەکە تەواوبکات.
کاروان شێخ زیرەک - حلە