دەستەی كارگێری یانەی هەولێر بەفەرمی گرێبەستی لەگەڵ سێ یاریزانی نوێ بۆ تیپی بەشداربووی خولی عێراق مۆركرد بۆ ئەوەی لە ریزی ئەم یانەیە بەشداری لە خولی نایابی عێراق بكەن.
بە ئامادەبوونی سەرۆكی یانەی هەولێر د. عەبدوڵڵا و مەحمود عەزیز جێگری سەرۆكی یانە و پشتیوان شەبیب ئەندامی دەستەی كارگێری یانەكە، بەفەرمی یانەی هەولێر گرێبەستی لەگەڵ هەر سێ یاریزان ( رێكار هاشم) لە یانەی هەندرێن و كامەران عەلی و دیار یاخی لە یانەی زاخۆ مۆركرد.
رێكار هاشم لە دایكبووی ساڵی 1993ی شاری هەولێر و لە تازەپێگەیشتووان تا تیپی یەكەم تەنیا لە یانەی هەندرێن یاریكردووە و لە هێڵی ناوەڕاست یاری دەكات، ئەم یاریزانە سەرنجی هەموو لایەكی بۆ خۆی راكێشا بەهۆی ئاست بەرزی و هەروەها چەندین یانە بە پێشكەشكردنێ گرێبەستی گرانبەها هەوڵی مۆركردنی گرێبەستیان لەگەڵ دەدا، بەڵام نابراو گشت گرێبەستەكانی رەتكردووە تەنیا یانەی هەولێر-ی هەڵبژارد و رێكار لەگەڵ هەڵبژاردەی لاوانی كوردستان بەشداری لە پاڵەوانێتی نۆروەی كۆپ-ی كردووە لە ساڵی 2013.
دیار یاخی لە دایكبووی ساڵی 1991ی شاری چەمچەماڵ-ە و پێشتر لە ریزی یانەكانی (خاك، پێشمەرگەی سلێمانی، سلێمانی، زاخۆ) یاریكردووە و لە هێڵی بەرگری یاری دەكات و هەروەها لەگەڵ یانەی زێرەڤانی بەشداری لە پاڵەوانێتی مەرسلیا كرد و توانی نازناوەكە بە دەستبهێنێت و لەگەڵ هەڵبژاردەی كوردستان بەشداری لە پاڵەوانێتی ڤیڤا كرد لە وڵاتی سوید.
كامەران عەلی ناسراو بە (كامۆ) لە دایكبووی ساڵی 1987ی شاری سلێمانیە و لە هێڵی ناوەڕاست یاری دەكات و پێشتر لە ریزی یانەكانی بەختیاری و سیروانی نوێ و سلێمانی و زاخۆ یاریكردووە .
جێگەی باسە گرێبەستی هەر سێ یاریزان لە بارەگای یەكێتی تۆپی پێی لقی هەولێر پەسند كرا و بەفەرمی بوونە یاریزانی یانەكە.
رێبین رەمزی