دلۆڤان مەهدی یەكێكە لە گۆڵپارێزە هەرە بەتواناكانی كوردستان و عێراق، ناوبراو ئەمساڵ بە ئاستە بەرزەكەی لە یارییەكانی خولی نایابی تۆپی پێی كوردستان توانی ئاستێكی بەرز پێشكەش بكات و نازناوی باشترین گۆڵپارێزی لەسەر ئاستی خولەكە پێبەخشرا، دلۆڤان لە دایكبووی ساڵی 1987ی شاری زاخۆیە ماوەی چەند ساڵێكە لە ریزی یانەی وەرزشی یاری دەكات، چەندین ئەنجامی بەرچاوی بەدەست هێناوە لەگەڵ یانەی زاخۆ ئێمەش لە نزیكەوە چەند پرسیارێكمان ئاراستەی كرد.
دیمانە: كارزان كانەبی

* ئاستی ئەمساڵی خولی نایابی كوردستان چۆن بوون بەگشتی؟
- بەڕاستی ئاستی خولی كوردستان ساڵ بە ساڵ بەهێزتر دەبێت، بە بۆچوونی منیش ئەمساڵ خۆشترین خول بوو لە هەموو روویەكەوە زۆریش بەهێز بوو، یانەكانیش ئاستیان بەرز بوو.
* بۆ پێشخستنی خولەكە پێت باشە لەئێستادا چی بكرێت؟
-ئەوەی ڕاستی بێت ئەگەر ژمارەی یانەكان لە 14 یانەوە زیاد بكرێت 20 یانە باشتر دەبێت و خولەكەش زیاتر بەهێز دەبێت چونكە كێبڕكێیەكان زیاتر دەبن، پێشم باشە یاریگای یانەكان چاك بكرێت، چونكە بەهێزیی و باشیی خولیش پەیوەستە بە باشی یاریگاكان چونكە بەشێك لە یاریگاكانی یانەكان زۆر خراپن هی ئەوە نییە یارییان تێدا ئەنجام بدرێت.
* هەستت چۆن بوو كاتێك خەڵاتی باشترین گۆڵپارێزت پێدرا؟
-هەستێكی یەكجار خۆشم هەبوو چونكە بۆ دووەم جارە ئەم خەڵاتە دەبەمەوە كە باشترین گۆڵپارێز لەسەر ئاستی كوردستان بۆ من دەستكەوتێكی گەورەیە وام لێدەكات زیاتر گرنگی بە ئاست و تواناكانی خۆم بدەم وەكو گۆڵپارێز لەنێو یاریگاو بەردەوامبم لە كێبڕكێ كردن لەگەڵ ئەوانی تر.
* بۆچی یانەی زاخۆ ئەم وەزرە نەیتوانی ئەنجامی شایستە بەدەست بهێنێت؟
- لە قۆناغی یەكەمدا ئاستی ئێمە زۆر باش بوو، بەڵام بە ڕاگرتنی یاریزانێكمان و دوورخستنەوەی پیشەگەرێك لەلایەن دەستەی كارگێڕیی یانەی زاخۆ، بۆیە لە قۆناغی دووەم ئاستمان وەكو پێوست نەبووە.
*هەست ناكەی لە یانەكانی كوردستان جیاوازی دەكرێت لە نێوان گۆڵچییەكانی عەرەب و كورد؟
- ئەم جیاوازییە بەدی دەكرێت، بەڵام لە هەندێك یانە نەك هەموو یانەكان.
* هەتاكەی چاوەڕوانی ئەوە دەكەیت كە لە یانەی زاخۆ بە یاریزانی سەرەكی یاریت پێبكەن لەخولی عێراقی، لەئێستادا زۆر جار بە یەدەگی دەبینرێی ؟
- ئەوەی ڕاستی بێت ئەوە بەرنامەی خۆم دامناوە بۆ ئەمساڵ كە قسە لەسەر ئەم بابەتە بكەم لە دەستەی كارگێڕیی یانەكەمان كە ئاستم باشە بۆچی یەدەگ بم لەخولی عێراقی.
* ئەمساڵ هیچ یانەیەك داوای نەكردووی یاریی بۆبكەی؟
- چەند یانەیەك پەیوەندیان پێوە كردم بۆ یاری كردنم لە ریزی یانەكانیان، بەڵام من لە نێوان هەموویان یانەی زاخۆم هەڵبژارد بۆ یاری كردن.
* هۆكاری چی بوو هەڵبژاردەی كوردستان ئەمساڵ نەیتوانی ئەنجامی شایستە بەدەست بهێنێت؟
- نەبوونی ئامادەكارییەكی باش و نەدانی چەند یاریزانێكی یانەكان بوونە هۆكاری خراپ لەم پاڵەوانیتییە.
* كێشەو گرفتان چییە لە یانەی زاخۆ؟
- لە یانەی زاخۆ هیچ كێشەیەكی ئەوتۆمان نییە شایەنی باس كردن بێت، سوپاس بۆ دەستەی كارگێڕی كە هاوكاری باشی ئێمەن.
*هیواو ئاواتت لەگەڵ یانەی زاخۆ؟
- هیواو ئاواتم ئەوەیە بتوانم ببمە گۆڵچیی سەرەكیی یانەی زاخۆ لە خولی نایابی عێراقی و بەهەوڵ و ماندووبوونی خۆشم ئەم هیوایەم دەهێنمە دی.
* بەرنامەت چییە كە ئێستا تۆ باشترین گۆڵچیی خولی كوردستان بووی؟
- هەوڵدەدەم زیاتر ئاست و توانای خۆم بەرەو پێش ببەم و پارێزگاری لەم نازناوە بكەم، چونكە ئێستا هەموو كوردستان چاویان لە منە.
* ئەگەر یانەیەكی دەرەوەی شاری زاخۆ داوای یاری كردنت لێ بكات ئامادەی یاری بۆ بكەیت؟
- ئەو كات سەیری بارودۆخی یانەكەم دەكەم و بڕیاری خۆم دەدەم، چونكە ئەمساڵ لەبەر باردۆخی ئاسایشی عێراق نەمتوانی گرێبەستی یانەیەكی گەورەی عێراق واژوو بكەم، ئەگەر نا یانەی زۆر گەورە هەبوون گرێبەستیان لەگەڵ بكەم.
* بەچ گۆڵكارێك زۆر سەرسامی لەخولی كوردستان و تۆ هەمیشە حسیابی تایبەتیت بۆكردووە؟
- گۆڵكاری بەتوانا لە خولی كوردستان زۆرن منیش حیساب بۆ هەموو هێرشبەرێك دەكەم لە هەر یانەیەك بێت.
* خۆشترین یاوەردەریی وەرزشیت چییە ؟
- بەدەست هێنانی نازناوی دووجار باشترین گۆڵپارێزی لەسەر ئاستی كوردستان و بەدەست هێنانی دووجامی كوردستان لەگەڵ زاخۆ ئەمانە یادەوەریی خۆشن لای من.