یانەی یۆڤانتسی ئیتالی كە لەپلەی یەكەمی خولی یانەكانی ئیتالیا دێت دووچاری كێشەیەكی گەورە هات بە هۆی پێكانی یاریزانی هێلی ناوەراست ئەندریا پێرلۆ، پێرلۆ لە یاری یانەكەی بەرامبەر یانەی ئۆدینیزی تووشی پێكان هات و نەیتوانی یارییەكە تەواو بكات، دەستەی پزیشكانی یانەی خانمە پیرەكە ئەم هەواڵەیان دووپات كردەوەو رایانگەیاند پێكانی پێرلۆ لە جۆری داڕوشانی ماسولكەی پلە دووە بەڵام ماوەی دووركەوتنەوەی یاریزانی ناوبراویان دیاری نەكرد.
پێرلۆ بۆ ماوەی 15 خولەك یاریكرد و یاریگای بەجێهێشت و نەیتوانی یارییەكە تەواو بكات، پێكانی لەم جۆرە بە بۆچوونی پسپۆران بەلانی كەم دوو مانگ پشووی پێویستە بۆ ئەوەی یاریزانەكە بگەڕێتەوە یاریگاكان، یۆڤانتس بە دووركەوتنەوەی پێرلۆ هێلی ناوەراستی تووشی كێشەیەكی گەورە دەبێت بە تایبەتی كە ئێستا لەپلەی یەكەمی خولی ئیتالیا دێت و پێویستی بەیەك خاڵە لە خولی یانە پاڵەوانەكانی ئەوروپا بەرامبەر یانەی گەلاتەسەرای توركی بۆ ئەوەی بگاتە قۆناغی دووەم .