خافێر پاستۆری یاریزانی یانەی پاریس سان جێرمان و هەڵبژاردەی ئەرژەنتین خۆی ئامادە دەكات لە وەرزی زستانەی گواستنەوەی یاریزانان شاری پاریس بەجێبهێڵێت و روو لەخولی ئینگلتەرا بكات ئەگەر بێتو بە بەردەوامی فەرامۆش بكرێت لەلایەن راهێنەری یانەی پاریس سان جێرمان لۆران بلان و لەپێكهاتەی سەرەكیی یانەكەی یاری نەكات، رۆژنامەی ئەكسپرێسی بەریتانی ئەم هەواڵەی ئاشكرا كرد و رایگەیاند هەریەك لە یانەكانی چێلسی و ئەرسنال هەوڵی هێنانی پاستۆری دەدەن ئەگەر یاریزانی ناوبراو بڕیاری رۆیشتن بدات.
دێڤی جونال بەڕێوەبەری وەرزشیی پێشووی یانەی پاریس سان جێرمان بە رۆژنامەی ئەكسپرێسی راگەیاندووە زۆر زەحمەتە پاستۆری لە یانەی پاریس سان جێرمان تا كۆتایی ئەم وەرزە بەردەوام بێت ئەگەر لە هێڵی یەدەگی یانەكەی بمێنێتەوە و راهێنەر لۆران بلان فەرامۆشی بكات و یاری پێنەكات، جۆنال ئەوەشی راگەیاند پاستۆری لەسەری ساڵی داهاتوو روو لەخولی ئینگلتەرا دەكات ئەگەر راهێنەر لۆران بلان بەم شێوەی ئێستا مامەڵەی لەگەڵ بكات و لەپێكهاتەی سەرەكی دووری بخاتەوە.
شایانی باسە یاریزان پاستۆری لە هاوینی ساڵی 2011 لە یانەی پالێرمۆی ئیتالی پەیوەندی بەیانەی پاریس سان جێرمان كردووە بە بڕی 32 ملیۆن یۆرۆ .