لە شەقامی شانزلیزێی بەناوبانگ لەشاری پاریس پێشبڕكێیەكانی پاڵەوانیەتی فەرەنسای نێودەولەتی لەیاری پایسكل سواری ناسراو بە تۆر دۆ فرانس بۆ ساڵی 2013 كۆتایی هات و بۆ ساڵی دووەم لەسەریەك نازناوەكە بۆ بەریتانیەكان بوو، پایسكل سواری بەریتانی كریس فرۆم نازناوەكەی بەدەست هێنا دوای ئەوەی لە 21 قۆناغی پێشبڕكێیەكەدا ئاستێكی بەرزی پێشكەش كرد و بەجیاوازیی زیاتر لە چوار خولەك بەپێش نزیكترین ركابەرەكانی كەوت، فرۆم لە پاڵەوانییەتی 2013 لە سێ قۆناغدا پلەی یەكەمی بەدەست هێنا، لە ساڵی 2012 پایسكلسواری بەریتانی برادلی وینگز نازناوەكەی بەدەست هێنا بەڵام بە هۆی پێكانەوە نەیتوانی بەشداری لە پاڵەوانێتیی 2013 بكات .
پاڵەوانێیتی 2013 تایبەتمەندیی خۆی هەبوو چونكە پاڵەوانێتیی ژمارە 100 بوو كە لەساڵی 1903 دەستی پێكردووە و لە ساڵانی جەنگی دووەمی جیهان لە 1939 تا 1947 ئەنجام نەدراوە، تا ئێستاش پایسكلسوارانی فەرەنسا 36 نازناویان بەدەست هێناوە ئینجا پایسكلسوارانی بەلژیكا بەپلەی دووەم دێن بە 18 نازناو و ئیسپانیا بە 12 نازناو و ئیتالیا بە 9 نازناو و لۆكسەمبۆرگ بە 5 نازناو و ئەمریكا بە 3 نازناو و دوو نازناو بۆ پایسكلسوارانی بەریتانیا و هۆڵەندا و سویسرا و یەك نازناو بۆ پایسكل سوارانی ئەڵمانیا و ئوستورالیا و دانیمارك و ئێرلەندا .
ریزبەندی كۆتایی پایسكلسوارانی تۆر دۆ فرانس لە ساڵی 2013 بەم شێوەیە بوو :
1- كریس فرۆم لە بەریتانیا 83.56.40 كاتژمێر
2- نایرۆ كوینتانا لە كۆلۆمبیا بە جیاوازی 4.20 خولەك
3- خواكین رۆدریگز لە ئیسپانیا بە جیاوازی 5.04 خولەك
4- ئەلبرتۆ كۆنتادۆر لە ئیسپانیا بە جیاوازی 6.27 خولەك
5- رۆمان كرۆیزیگەر لە كۆماری چیك بە جیاوازی 7.27 خولەك