ئەستێرەی ئەرژەنتینی لیۆنێل میسی هێڕشبەری یانەی بەرشلۆنە رایگەیاند حەز دەكات لەگەڵ یانەی بەرشلۆنە كۆتایی بەژیانی وەرزشی خۆی بهێنێت بەڵام نازانێت لەداهاتوودا چی روودەدات، میسی لەكۆنگرەیەكی رۆژنامەوانییدا لەشاری دەوحەی پایتەختی وڵاتی قەتەر گوتی : بیرم لەوە نەكردۆتەوە رۆژێك لە رۆژان لەیانەیەكی دیكە جگە لەیانەی بەرشلۆنە یاری بكەم، حەز دەكەم لەم یانەیە كۆتایی بەژیانی وەرزشی خۆم بهێنم، بەڵام لەگەڵ ئەوەشدا مرۆڤ نازانێت لە داهاتوودا چی روودەدات .
دەربارەی دۆڕاندنە گەورەكەی یانەی بەرشلۆنە بەرامبەر یانەی بایرەن میونیخ لە قۆناغی پێش كۆتایی خولی یانە پاڵەوانەكانی ئەوروپا میسی دانی بەوەدانا كە بایرەن میونیخ باشتر یاریكرد و شایستەی سەركەوتن بوو، میسی گوتی: یارییەكەمان بەرامبەر بایرەن میونیخ زۆر زەحمەت بوو، ئەوان باشتربوون لەرووی خێرایی و توانای جەستەییەوە و شایستەی سەركەوتن بوون، تیپەكەمان لە هەندێك لەیارییەكان بەئاستێكی ناجێگیر یاریكرد و ماندووبوون بەیاریزانەكانمانەوە دیاربوو چونكە چەندین یاری بەهێزمان ئەنجامدا، بەڵام ئێمە نازناوی لیگامان بردەوە و ئێستا تەنها بیر لەوە دەكەینەوە بەباشترین شێوە خۆمان بۆ وەرزی داهاتوو ئامادە بكەین و نازناوی زیاتر ببەینەوە .
شایانی باسە میسی لە سەردانەكەی بۆ وڵاتی قەتەر رێككەوتنێكی وەك دەزگای لیونیل میسی بۆ كاری خێرخوازی لەگەڵ كۆمپانیای ئۆریدۆ مۆركرد بۆ یارمەتیدانی منداڵە نەخۆشەكانی ناوچەی رۆژهەڵاتی ناوەڕاست .