شه‌وی رابرد‌وو له‌ شاری سلێمانی ته‌قه‌یه‌كی زۆر كرا، به‌ وته‌ی پۆلیسی سلێمانیش هۆكاری ته‌قه‌كان دوای بردنه‌وه‌ی یانه‌ی ریاڵ مه‌درید بووه‌ له‌ یانه‌ی به‌رشه‌لۆنه‌ و ته‌قه‌كانیش زیانیان به‌دواوه‌ نه‌بوه‌.

دوای كۆتاییهاتنی یارییه‌كه‌ی شه‌وی رابردو و بردنه‌وه‌ی یانه‌ی‌ ریاڵ مه‌درید له‌ یانه‌ی به‌رشه‌لۆنه‌، به‌ سێ گۆڵ به‌رامبه‌ر به‌ یه‌ك گۆڵ، هه‌وادارانی یانه‌ی ریاڵ مه‌درید له‌ سلێمانی ده‌ستیان به‌ ته‌قه‌ی خۆشی كرد و ماوه‌یه‌ك به‌رده‌وامیی هه‌بوو.

لای خۆیه‌وه‌ نه‌قیب سه‌ركه‌وت ئه‌حمه‌د، وته‌بێژی به‌ڕێوه‌به‌رایه‌تی پۆلیسی سلێمانی به‌ (خه‌ندان)ی راگه‌یاند: ته‌قه‌كان به‌هۆی بردنه‌وه‌ی یانه‌ی ریاڵ مه‌دریده‌وه‌ بووه‌، به‌ڵام نه‌توانرا له‌لایه‌ن پۆلیسه‌وه‌ ئه‌و شوێنانه‌ ده‌ستنیشان بكرێن، كه‌ ته‌قه‌كه‌ی لێوه‌ ده‌كرا، به‌و پێیه‌ی زۆرینه‌ی ته‌قه‌كان له‌ناو ئۆتۆمبێلدا بوون.

ئاماژه‌ی به‌وه‌ش دا: له‌ ئه‌نجامی ئه‌و ته‌قه‌كردنه‌دا هیچ زیانێكی گیانی و مادی تا ئێستا نه‌كه‌وتووه‌ته‌وه‌



خەندان