كارزان كانەبی

لە بارەگای یانەی هەولێر بەفەرمی گرێبەستی راهێنەری یانەکە نەزار مەحروس بۆ ماوەی یەک وەرز نوێکرایەوە.
دوای ئەنجامدانی گفتوگۆ لە یانەی هەولێر هەریەکە لە د.عەبدوڵڵا مەجید سەرۆکی یانە و مەحمود عەزیز سکرتێر و یوسف عزەدین ئەمینداری دارایی یانەکە ئامادەبوون و هەروەها راهێنەر نەزار مەحروس و بەڕێوەبەری کارەکانی لە گفتوگۆیەکە ئامادەبوون.
دوای رێکەوتنی هەردوو لا لەسەر بەندەکانی گرێبەست و دابینکردنی پێداویستیەکانی راهێنەر، بەفەرمی راهێنەر نەزار مەحروس گرێبەستی بۆ ماوەی یەک وەرز نوێکردەوە و هەروەها بەفەرمی دەستەی راهێنەری یانەکە گرێبەستیان نوێکرایەوە، کە پێکهاتوون لە فواز مەندۆ یاریدەدەری راهێنەر و سامر ریحانی راهێنەری گۆڵپارێز و ئەحمەد راهێنەری لێهاتووی جەستەیی.
جێگەی باسە لە وەرزی رابردوو یانەی هەولێر بەفەرمی گرێبەستی لەگەڵ راهێنەر نەزار مەحروس مۆرکرد و توانی نازناوی خولی بژاردەی عێراق بۆ جاری چوارەم بە دەستبهێنێت و هەروەها توانی بۆ یەکەم جار لە مێژووی یانەکە بگاتە یاری كۆتایی جامی یەکێتی ئاسیا و پلەی دووەم بە دەستبهێنێت