كچە یاریزانی تۆپی سەرمێز دەلال یەكێكە لە یاریزانە بەتواناكانی شاری هەولێرو یانەی ئەكاد لە یاری تێنسی سەرمێز، توانیویەتی چەندین ئەنجامی بەرچاو لەگەڵ یانەكەی لەسەر ئاستی كوردستان بەدەست بهێنێت، ناوبراو لەدایكبووی ساڵی 1998ی شارۆچكەی عەنكاوەیە،ئێمەش لەنزیكەوە ئەم دیمانەیەمان لەگەڵیدا سازكرد.
* ئاستی یاریی تێنسی سەرمێز لە كوردستان چۆن دەبینیت؟
-ئاستی ئەم یارییە ساڵ بەساڵ باشتر دەبێت و ئاستی بەرەو پێشتر دەچێت، تەواوی یانەكانی كوردستان گرنگی زیاتر بە یاری تێنسی سەرمێز دەدەن، ئەمەش وایكرد ئاستی یارییەكە لە شارەكان بەرزتربێت و لە داهاتووشدا باشتر ببێت، كچانیش بەشێكن لەم پێشڤەچوونە.
* بە بۆچوونی تۆ بۆ بەرەوپێشچوونی ئەم یارییە چی بكرێت باشە؟
- بۆپێشكەوتنی ئەم یارییە پێویستیمان بەكردنەوەی قوتابخانەی پێگەیاندنی یاریزانان هەیە لەگشت شارەكانی كوردستان بۆ ئەوەی ئەم یارییە زیاتر پێش بكەوێت، هێنانی ڕاهێنەری بەئەزموون بۆ گشت ئاستەكانی تەمەن ومەشقی بەردەوامی یاریزانان.
* هەست ناكەیت یاریزانی كچ كەم بەشداری لەم یارییەدا دەكەن؟
-پێشتر وابوو كە ڕێژەی یاریزانانی ئافرەت كەم بوو، بەڵام ئێستا لەزیادبووندایە.
* كێشەو گرفتاتن لەم یارییەدا چییە؟
- لە یانەی ئەكاد هۆڵی تایبەتمان هەیە و مەشقی بەردەوام دەكەین، سوپاسی دەستەی كارگێڕی و ڕاهێنەرەكەمان دەكەم كە زۆر هاوكارمانن ناهێڵن هیچ كێشەیەكمان هەبێت.
* خوێندن رێگە لە وەرزش كردنت ناگرێت یان ببێتە هۆی دابڕانت لەوەرزش؟
-تائێستا نەمهێشتوە ئەو بۆشاییەم بۆ دروست بێت، هەر دوو لام بەیەكسانی ڕاگرتووە.
*لە هەڵبژاردەی عێراق داوانەكراویت؟
- نەخێر، بەڵام لەداهاتوودا هەوڵی بۆ دەدەم، تاكو ببمە یەكێك لە یاریزانانی هەڵبژاردەكە.
*چی بەو كچانە دەڵێیت كە لە وەرزش كردن دوورن؟
-بەهیوای ئەوەم كچانیش بەشداریی وەرزش بكەن و بتوانن بوونی خۆیان بسەلمێنن و لە رووی وەرزشەوە ببنە كەسانی بەسوود بۆ كۆمەڵگا كەیان.
* وەكو كچە یاریزانێك هیواو ئاواتت لەم یارییەدا چییە؟
-هیوام وایە بتوانم ئەنجامێكی شایستە لەم یارییەدا بەدەست بهێنم، ببمە جێگای متمانەی یانەكەم، ناوی یانەی ئەكادیش بەرز بكەمەوە.
* یانەی ئەكاد هاوكاریتان دەكات؟
-بەسوپاسەوە هاوكاریی بەردەواممان دەكەن لەگشت روویەكەوە.