وادیارە تیۆ والكۆتی هێرشبەری یانەی ئەرسناڵی ئینگلیزی دەبێتە سەردێڕی ماوەی گواستنەوەی داهاتوو، بە تایبەت كە گرێبەستی ئەو یاریزانە لێهاتووە لەگەڵ یانەكەی لە كۆتایی وەرزی ئەمساڵدا تەواو دەبێت و بەوەش ئەگەر گرێبەستەكەی نوێ نەكاتەوە، ئازادە لەوەی روو لە هەر یانەیەكی تر بكات.
رۆژنامەی دەیلی ستاری ئینگلیزی گوتی ئەو یاریزانە لەلایەن مانچستەر ستییەوە بە بایەخەوە داواكراوە و رۆبەرتۆ مانچینی راهێنەری یانەكە پێی وایە ئەو باشترین هێرشبەری لاباڵی ئینگلیزییە، ئەمە جیا لەوەی دی ماتیۆی راهێنەری یانەی چێڵسیش هەمان بۆچوونی لەسەر والكۆت هەیە و داوای كڕینی دەكات.
هەرچی یانەی ئەرسناڵە ئاشكرای كردووە كە نایەوێ ئەو یاریزانە لە یانەكە بڕوات و ئارسن ڤینگەری راهێنەری یانەكە ئاشكرای كردووە كە دەیەوێ بە زووترین كات دانووستانەكانی نوێكردنەوەی گرێبەستەكەی لەگەڵدا دەست پێ بكات.