جۆزیپی مارۆتای بەڕێوەبەری وەرزشی لە یانەی یۆڤنتۆسی ئیتاڵی گوتی یانەكەمان پشتگیری لە ئەنتۆنیۆ كۆنتی راهێنەری دەكات و دەستبەرداری نابێت دوای ئەوەی بەهۆی سكانداڵی كالچیۆسكۆمێسییەوە بۆ ماوەی 10 مانگ راگیرا.
بەڕێوەبەرەكە دووپاتی كردەوە كە مانەوەی كۆنتی لە پۆستەكەیدا وەك راهێنەری یۆڤنتۆس جێگەی قسە لەسەركردن نییە.
مارۆتا گوتی لە دوای بڕیارەكەوە هەستی خۆش و ناخۆش بەسەرماندا زاڵە، دڵخۆشین بە بێتاوان دەرچوونی بۆنۆچی و پیپی یاریزانانی یانەكە، لە هەمان كاتدا دڵتەنگین بەوەی راهێنەری یانەكەمان تۆمەتبار كراوە.
بەرپرسەكەی یۆڤنتۆس جارێكی تر بڕیاری سزاكەی رەتكردەوە و گوتی ئێستاش پێمان وایە بڕیارەكە بڕیارێكی سەیر و جێگەی مشتومڕە، ئێمە لە هەنگاوەكانی خۆمان بەردەوام دەبین بۆ سووككردنی سزاكە و بەرگری لە راهێنەرەكەمان.
كۆنتی سزادراوە بە تۆمەتی شاردنەوەی زانیاری كاتێك راهێنەری یانەی سیێنا بووە و چەند بەرپرسێكی یانەكە بە پارە كاریان بۆ گۆڕینی ئەنجامی یارییەكان كردووە.