دوای كۆتاییهاتنی یارییەكانی رۆژی هەشتەمی خولی یارییە ئۆڵۆمپییەكانی لەندەن 2012، وەرزشوانانی ئەمەریكا درێژەیان بە پێشەنگ و دەستڕۆیی خۆیان بەسەر یارییەكاندا دا، دوای ئەوەی پێشەنگی بردنەوەی میدالیا زێڕەكانیان بۆ رۆژی دووەم لەسەر یەك لە چین وەرگرتەوە.
دوای سەرەتایەكی بەرچاوی یاریزانانی چینی و بردنەوەی میدالیای زێڕەكان و گرتنی پێشەنگی وڵاتان تا رۆژی حەوتەمی ئۆڵۆمپیادەكە، لە رۆژی حەوتەمدا ئەمەریكییەكان توانییان هاوكێشەكان هەڵبگێڕنەوە و بگەنە پێشەنگی ریزبەندی وڵاتانی براوەی میدالیاكان و ئەم باڵادەستییە بۆ رۆژی هەشتەمیش بەردەوام بوو.
ریزبەندی وڵاتانی براوەی میدالیاكان دوای كۆتایی هاتنی ركابەرییەكانی رۆژی هەشتەم بەم شێوەیە بوو: ئەمەریكا لە پلەی یەكەم بە كۆی 54 میدالیا بە 26 زێڕ و 13 زیو و 15 مس. چین لە پلەی دووەم بە 53 میدالیا كە پێكهاتووە لە 25 زێڕ و 16 زیو و 12 مس. بەریتانیا بە 29 میدالیای هاتە پلەی سێیەم بەهۆی بەرزبوونەوەی كۆی میدالیا زێڕەكانی بۆ 14 میدالیا لەگەڵ 7 زیو و 8 مسدا.
كۆریای باشوور بە 17 میدالیا ریزبەندی چوارەمی گرتووە كە 9 زێڕ و 3 زیو و 5 مسی تێدایە و ریزبەندی پێنجەمیش بەدەستی فەرەنساوەیە كە 22 میدالیای هەیە كە دابەشبوون بەسەر 8 زێڕ و 6 زیو و 8 مسدا.