وا دیارە یانەی بەرشلۆنە بۆتە بەربەستێكی گەورە لە بەردەم یانەكانی ئەوروپا و شكست پێهێنانی ئەم یانەیە كارێكی زەحمەتە، تەنانەت رۆژنامەكانیش هەوڵدەدەن بۆ ئەم مەبەستە، رۆژنامەی گاردیانی بەریتانی پێكهاتەیەكی لە 11 یاریزان دەست نیشان كردووە و ناوی لێناوە پێكهاتەی خەونەكان بۆ بردنەوە لە بەرشلۆنە.
پێكهاتەكە ئەم یاریزانانەی لە خۆگرتبوو، پیتەر چیك گۆڵچی یانەی چێلسی و هەڵبژاردەی چیك، سێرجۆ رامۆسی ئیسپانی بەرگریكاری لای راست، هەردوو یاریزانی بەرازیلی لۆسیۆ و یاریزانی بەلژیكی كۆمبانی لە ناوەڕاستی بەرگری، ئاشلی كۆلی ئینگلیزی بەرگریكاری لای چەپ.
لە هێڵی ناوەڕاست یاریزانان خافێر زانێتی ئەرژەنتینی و ستیڤن جیراردی ئینگلیزی و ویسلی شنایدەری هۆڵەندی و كریستیانۆی پورتوگالی یاری بكەن، هێرشبەرانیش هەر یەك لە یاریزانان كارلۆس تیڤێزی ئەرژەنتینی و وێین رونی ئینگلیزی بە یەكەوە یاری بكەن.