گلاندی دەرەقی Thyroidgland شێوە پەپوولەییە، كەوتۆتە بەشی پێشەوەی مل، بەرپرسە لە بەشێكی زۆری فرمانەكانی لەش، ئەگەر ئەم گلاندە بە باشی كاری خۆی نەكات، ئەوا كاریگەری دەكاتە سەر زۆربەی هەرە زۆری كار و چالاكییەكانی لەش، لە مەزاجەوە بگرە تا دەگاتە سووڕی مانگانەی ئافرەت.
چەند راستییەك سەبارەت بەم گلاندە:
• گلاندی دەرەقی بۆ لەش وەكو بزوێنەرە، هۆرمۆنەكانی ئەم گلاندە كرداری میتابۆلیزم رێكدەخەن، واتا چەندێتی سووتاندنی كالۆری، لەگەڵ خێرایی كاركردنی دڵ و مێشك و ئەندامەكانی دیكە.
• گرفتەكانی گلاندی دەرەقی زیاتر دوچاری ئافرەت دەبنەوە، لەبەرئەوەی كە خانەكانی گلاندی دەرەقی هەستییارن بەرانبەر بە هۆرمۆنی مێیینە، یان ئیسترۆجین Estrogen هەیە.
• گرفتەكانی گلاندی دەرەقی لەوكاتەی كە هۆرمۆنەكانی گلاندی دەرەقی كاریگەری دەكەنە سەر سووڕی مانگانە رۆڵیان لە تووشبوون بە نەزۆكی هەیە.
• پاش منداڵبوون نزیكەی 10%ی ئافرەتان لە گلاندی دەرەقیدا دووچاری گرفت دەبن، كە بەگشتی لە ماوەی 18 مانگدا خۆیان چاكدەبنەوە. • نیشانەكانی ناچالاكبوون، یان سستبوونی گلاندی دەرەقی بریتین لە: هەستكردن بە ماندووبوون، زیادبوونی كێشی لەش، قەبزی، وشكبوونی پێست، خەمۆكی.
• نیشانەكانی زیادبوونی چالاكی، یان زیادكاركردنی گلاندی دەرەقی ئەمانەن: هەستكردن بە ناڕەحەتی، دابەزینی كێشی لەش، زیادبوونی لێدانەكانی دڵ، تەنكبوونی قژ، زەقبوونی چاوەكان، دەست لەرزین.