بیستن یەكێكە لە فرمانە زۆر گرنگەكانی لەش، بۆیە پاراستنی توانای بیستن زۆر پێویستە. تەمەن یەكێكە لە مەترسییەكان لەسەر هەستی بیستن، چونكە دەبێتە ئەگەری تێكچوونی خانەكانی گوێی ناوەوە، بەمەش هەستی بیستن كەم دەبێتەوە، بەڵام دەكرێ بە چەند هەنگاوێكی سادە و زۆر كاریگەر هەستی بیستن بە درێژایی ژیان تا رادەیەكی زۆر بپارێزرێت، وەكو:
• دووركەوتنەوە لە دەنگی بەرز، یان ژاوەژاو و قەرەباڵغی لەگەڵ بەكارنەهێنانی هێدفۆن و گوێگرتن لە مۆسیقا بە دەنگی بەرزی ئامێر و كۆنسێرتەكان، هەروەها دووركەوتنەوە لە قەرەباڵغی شەقام و شوێنەكانی دروستكردنی باڵاخانەكان.
• لە ماڵەوە دەتوانیت چەند یارمەتیدەرێكی بیناسازی و ئەندازەیی بەكاربێنیت بە مەبەستی كەمكردنەوەی گواستنەوەی دەنگ.
• بەكارهێنانی پێداویستیی پاراستنی گوێ لە دەنگی بەرز وەكو داخەرەكانی گوێ Earplugs یان Earmuffs.
• دووركەوتنەوە لە جگەرەكێشان، چونكە هۆكارە بۆ لەدەستدانی بیستن.
• لابردنی مۆمی گوێ بە شێوەیەكی دروست بە رێنمایی دكتۆر، لەگەڵ دووركەوتنەوە لەو دەرمانانەی كە زیانی لابەلایان هەیە و هەستی بیستن كەم دەكەنەوە وەكو ئەسپرین، ڤۆلتارین، برۆفین، كوینین.
• ئەنجامدانی پشكنین بۆ گوێ و هەستی بیستن بە شێوەیەكی دەوری لە لایەن دكتۆرەوە، تەنانەت ئەگەر هەست بە هیچ گرفتێك لە هەستی بیستندا نەكەیت.