زوو بەشوودان و فشاری خێزان بۆ زوو دووگیانبوون هێشتا لە هەندێك كۆمەڵگە و كەلتووردا پەیڕەو دەكرێت. ساڵانە رێژەیەكی بەرزی مردن لە نێو ئافرەتە دووگیانەكاندا كە تەمەنیان لە ژێر تەمەنی 18 ساڵیدایە لە سەرتاسەری جیهاندا تۆمار دەكرێت، لەبەر ئاڵۆزییەكانی پەیوەست بە دووگیانی وەكو ژاراویبوونی دووگیانی Eclampsia، كەمخوێنی توند، لەدایكبوونی پێشوەخت و بوونی منداڵی ناكام Premature و كەم كێش، خوێنبەربوون لەكاتی دووگیانیدا، بەرزبوونەوەی پەستانی خوێن، گرفتی دیكەی پەیوەست بە منداڵبوون.
هەر چەند تەمەنی ئافرەت بچووكتر بێت هێندە ئەگەری ئاڵۆزییەكانی پەیوەست بە دووگیانی و مردنی دایك و كۆرپە زیاتر دەبێت. زوو شووكردن و دووگیانبوون گرفت بۆ دایك و كۆرپە پەیدا دەكات، منداڵبوون لەم تەمەنانەدا زۆر جار گران و مەترسیدار دەبێت، هەروەها ئەگەری مردنی منداڵیش لە ساڵی یەكەمی ژیانیدا زۆرە، هەروەها لە تەمەنی هەرزەكاریدا هێشتا قەبارەی حەوز بە تەواوی پەرەی نەسەندووە و جێگیر نەبووە. زوو شووكردن واتە زیادبوونی ژمارەی دووگیانییەكان و زیادبوونی ژمارەی منداڵ، سەرقاڵبوونی ئافرەت، دواكەوتن یان وازهێنان لە تەواوكردنی خوێندن، لەگەڵ خراپبوونی باری ئابووری. كچی هەرزەكار و گەنج، ئەگەر شووی كردبێت، یان شوی نەكردبێت، هاریكارییەكی تایبەتی پێویستە بۆ دواخستنی دووگیانی هاوكات لەگەڵ روونكردنەوەی ریسكە تەندروستییەكان.