لەكاتی كۆبوونەوەی چەوری لەژێر پێستی Subcutaneous fat ناوچەی ورگدا، ئەوا بێگومان رێژەی چەوری ناو سكیش یان هەناو Visceral fat واتە لە دەوری ئەندامەكانی ناوسك زیاد دەبێت یان زیاد كۆدەبێتەوە. رێژەی بەرزی چەوریی ناوسك یان هەناو بە پێوانەی چێوەی كەمەر یان بە پشكنینی رەنینی موگناتیسی یان سكانی CT دەستنیشان دەكرێت. بە پێی رێنماییەكانی رێكخراوی تەندروستیی جیهانی WHO بۆ دانیشتوانی كیشوەری ئاسیا، بۆ بەلاوەنانی زیانی چەوری كەرش بۆ تەندروستی، پێویستە كە پێوانەی چێوەی كەمەر كەمتر بێت لە 89 سم بۆ پیاو لە 79 سم بۆ ئافرەت. بەبێ هۆكاری روون، چەوری زیادی كەرش هۆكارە بۆ زیادبوونی بەرگریی لەش بەرانبەر بە هۆرمۆنی ئیسنولین و تووشبوون بە شەكرەی جۆری دووەم، لەگەڵ زیادبوونی ئەگەری تووشبوون بە نەخۆشیی دڵ، جەلتە، هەناسەتەنگی لەكاتی نووستندا، پووكانەوەی ئێسك، هەندێك جۆری شێرپەنجە. تا ئێستا هیچ رێگایەكی زانستی نییە بۆ دابەزاندنی چەوری كەرش یان بچووككردنەوە ورگ بە تەنیا، دەكرێ تا رادەیەك بە نەشتەرگەری جوانكاری وەكو راكێشانی چەوری Liposuction هەندێك لە چەوری ژێر پێستی دیواری سك لاببرێت، بەڵام چەوری ناو سك وەكو خۆی دەمێنێتەوە، واتە ریسكی تەندروستیش وەكو خۆی دەمێنێتەوە، لێكۆڵینەوەكانیش جەخت لەوە دەكەنەوە كە لەكاتی لابردنی چەوریی ژێر پێست ئەوا رێژەی چەوریی ناو سك زیاد دەبێت. زۆر كەس پێیان وایە كە بە مەشقەكانی ورگ قەبارەكەی بچووك دەبێتەوە، لە راستیدا ئەم مەشقانە تەنیا بۆ توندكردن یان گرژكردنی ماسوولكەكانی دیواری سك سوودیان هەیە و هەرگیز نابنە هۆی كەمكردنەوەی یان تواندنەوەی چەوریی دیواری سك و ناو سك، بۆیە بۆ كەمكردنەوەی هەر دوو جۆری چەوری پێویست بە بەرنامەی دابەزاندنی كێش گشتی لەش دەكات بە رێگای ریجیم و مەشقی وەرزشی لەژێر چاودێریی دكتۆردا.