زۆربەی ئافرەتان لە ماوەی چەند مانگێكی پاش منداڵبووندا دوچاری تەنكبوونی قژ دەبنەوە كە بە حاڵەتێكی ئاسایی هەژمار دەكرێت، چونكە پاش ماوەیەك قژ وەكو جاران چڕ و ئاسایی دەبێتەوە پاش ئەوەی كە لەش خۆی لەگەڵ گۆڕانە هۆرمۆنییەكاندا دەگونجێنێت. لەكاتی دووگیانیدا بە كاریگەریی بەرزبوونەوەی ئاستی هۆرمۆنی ئیسترۆجین قژ بەهێز دەبێت و قۆناغی گەشەكردنی درێژدەبێت، بەڵام پاش منداڵبوون ئاستی هۆرمۆنی ئیسترۆجین بە شێوەیەكی بەرچاو دادەبەزێت، بەمەشەوە ژمارەیەكی زۆری تاڵە مووەكان دەچنە قۆناغی حەسانەوە، ئەمەش وادەكات كە لەكاتی شووشتن و شانەكردندا بە رێژەیەكی بەرچاو هەڵوەرێن. ئەم كاریگەرییە لەگەڵ گەڕانەوەی ئاستی هۆرمۆنی ئیسترۆجین بەرە بەرە نامێنێت و قژ ئاسایی دەبێتەوە، ئەمەش لە ماوەی 6-12 مانگدا بە تەواوی جێگیر دەبێت. ناتوانرێت كە ئەم تەنكبوونەی قژ بە تەواوی كۆنترۆل بكرێت، بەڵام بە پەیڕەوكردنی چەند هەنگاوێك دەكرێ رێژەكەی كەم بكرێتەوە، بۆ نموونە: كورتكردنی قژ، هاوسەنگكردنی خۆراك، بەكارهێنانی دەنكی ماڵتی ڤیتامین Multivitamins بە رێنمای دكتۆر، مامەڵەی دروست لەگەڵ شووشتن و ستایلكردنی قژدا.
