ئەگەرچی ماددەی خۆراكی خەزنكراو لە لەشدا هەیە، بەڵام ژەمی خۆراك لەكاتی خۆیدا زۆر پێویستە بۆ دابینكردنی وزە و ماددە گرنگەكان بۆ كاتژمێرە داهاتووەكان كە بەس بێت بۆ هەموو جۆرە چالاكییەك تا دەگاتە كاتی ژەمێكی سەرەكیی تر، ئەم مەسەلەیە گرنگیی زۆری هەیە، بەتایبەتی بۆ وەرزشوان و كرێكار و ئەو كەسانەی كە بەردەوام كاری فیزیكی قورس دەكەن، بۆ نموونە پێویستە خۆراكت وا رێكبخەیت كە ژەمە سەرەكییەكانت بەلای كەم بكەونە 2 كاتژمێر پێش دەستپێكردنی مەشقی وەرزشی یان هەر چالاكییەكی فیزیكی. خۆراكێكی دەوڵەمەند بە چەوری ماوەی بەتاڵبوونی گەدە دوادەخات، واتە بۆ ماوەیەكی زۆر لەناو گەدەدا دەمێنێتەوە، بۆیە خۆراكی چەور هەرگیز گونجاو نییە كە بخرێتە پێش كاتی مەشقی وەرزشییەوە. هەرسكردنی ژەمی زۆر چەور قورسە لەگەڵ ئاراستەبوونی بڕێكی زیاتری خوێن بۆ بۆڕییەكانی خوێنی دەوری رێڕەوەكانی كۆئەندامی هەرس، ئەمەش وا دەكات كە لەگەڵ جووڵەدا بڕێكی كەمتری خوێن بگاتە شانەكانی مێشك، بۆیە ئەو كەسە هەست بە ماندووبوون و بێهێزی دەكات. لە لایەكی ترەوە، ژەمێكی دەوڵەمەند بە شەكر زۆر بە خێرایی دەبێتە هۆی پەیدابوونی وزە و زوو تەواوبوونی ئەم وزەیە.