زێدە ئێسك لە پاژنەی پێدا Heel spur بریتییە لە نیشتنی كالسیۆم بە شێوەی نووكێكی تیژ لە بەشی خوارەوەی ئێسكی پاژنەی پێدا كە بەرە بەرە بۆ ماوەی چەند مانگێك گەشە دەكات و لەوانەیە كە درێژییەكەی بگاتە نیو گرێ، ئەمەش بە تیشكی X بە روونی دەست نیشان دەكرێت. زۆربەی حاڵەتەكان بێ ئازارن، بەڵام گەلێك جار ئازار لە پاژنەی پێدا سەرهەڵدەدات لەگەڵ هەوكردنی بەستەری توندی ژێرەوەی پێ كە لە شانەی ریشاڵەیی توند پێكهاتووە و پاژنەی پێ بە پێشەوەی پێ دەبەستێتەوە. هۆكارەكان بریتین لە: فشار لەسەر بەستەر و ماسوولكەكانی پێدا، كشانی شانەی ریشاڵی ژێرەوەی پێ، دڕانی بەردەوامی ئەو پەردەیەی كە ئێسكی پاژنەی پێ دادەپۆشێت، وەرزشی راكردن و بازدان، راكردن لەسەر رووی رەقدا، كەفشی ناڕێك، كێشی زیاد و قەڵەوی، بەساڵاچوون، نەخۆشیی شەكرە، وەستان بۆ ماوەی زۆر، تەختبوونی پێ Flat foot. هەنگاوەكانی چارەسەركردن بریتین لە: مەشقی تایبەت، كەفشی تایبەت بۆ كەم كردنەوەی فشار لەسەر پاژنەی پێدا، دەرمان بە رێگای دەم، دەرزی خۆجێیی كۆرتیزۆن راستەوخۆ بۆ پاژنەی پێ، لە كۆتایشدا نەشتەرگەری.