پیسبوونی هەوا Air pollution لە دەرەوە و ناوماڵدا بریتییە لە پیسبوونی ژینگە بە هۆكارێكی كیمیایی، فیزیایی، یان بایۆلۆژی كە ببێتە هۆی گۆڕان لە سیفەتە سروشتییەكانی ئەتمۆسفیر. پیسبوونی هەوای ناوماڵ Indoor air pollution دەبێتە هۆی نەخۆشی لە كۆئەندامی هەناسە و نەخۆشیی دیكە كە لەوانەشە كوشندە بێت. ئامادەكردنی خۆراك و گەرمكردنی ناو ماڵ بە سووتەمەنی رەق یان سۆبای نەوتی هۆكارن بۆ پیسبوونی ژینگەی ناوماڵ، بەم شێوەیە هەوای ناوماڵ تا رادەیەكی بەرز پیس دەبێت بە گازی یەكەم ئۆكسیدی كاربۆن و هەندێك گەردیلەی زۆر بچووك كە توانایان هەیە بگەنە قوڵایی سییەكان و زیانی گەورە بە تەندروستی بگەیەنن. لە هەوای ناو ماڵێكدا كە هەواگۆڕی تێدا نەبێت، رێژەی ئەم گەردیلانە 100 هێندەی ناوماڵێكی ئاسایی زیاترە. ئەگەری زیاتری پیسبوونی هەوای ناوماڵ زیاترە لەناو ئەو ماڵانەی كە هەواگۆڕی تێدا نییە یان لاوازە، ئەمەش زیاتر كاریگەری دەكاتە سەر تەندروستیی ئافرەت و منداڵان كە زۆربەی كاتیان لە ماڵەوە بەسەردەبەن. ساڵانە نزیكەی 2 ملیۆن كەس گیان لەدەست دەدەن لەبەر نەخۆشی پەیوەست بە پیسبوونی ژینگەی ناوماڵ بە هۆی بەكارهێنانی سووتەمەنی رەقەوە، هۆكاری مردن دەگەڕێتەوە بۆ 44% بەهۆی هەوكردنی شانەی سییەكان، 54% بەهۆی نەخۆشی درێژخایەنی كۆئەندامی هەناسە و 2% بە هۆی شێرپەنجەی سییەكان.