ئالفرێد ئادلەر دەڵێت: «گەشەسەندنی ئاگایی و لایەنی بایەلۆجی و جەستەیی مرۆڤ، شان بەشانی یەك نەبووە، بەڵكو ئاگایی مرۆڤ، بە بەراورد لەگەڵ لایەنی جەستەیی، زۆر زیاتر پەرەی سەندووە، ئەمەش سەرچاوەی زۆرینەی گرفتەكانی مرۆڤە، مرۆڤ بونەوەرێكە كە كەشتی ئاسمانی دروست دەكات و گەشت بۆ هەسارەكان دەكات، جۆرەها ئامێر و تەكنەلۆجیای دروست كردووە، تەكنیك خەریكە دەگاتە لوتكە، زیرەكیی دەستكردی دروست كردووە، بەڵام سەر ئێشە، یان ئازارێكی گەدە، دەیخاتە جێگە و بڕستی لێ دەبڕێ، لەوانەشە لە ژیان نائومێدی بكات، بەڵام گەشەسەندنی لایەنی جەستەیی و ئاگایی ئاژەڵ بە پێچەوانەی مرۆڤەوەیە، واتە لایەنی جەستەیی ئاژەڵ زیاتر گەشەی كردووە وەك لە لایەنە ئاگاییەكەی، سەرەنجام ئەوەش لە سوودی ئاژەڵ شكاوەتەوە. نمونەیەكی سادە ئەمە زیاتر روون دەكاتەوە: یەكێك لە ئامانجە سەرەكییەكانی رۆحانییەت ئەوەیە؛مرۆڤ بۆ ئەوەی بتوانێ دەروونێكی ئارام و ئاسوودەی هەبێ و دواجار خۆی بناسێ، دەبێ بتوانێت لە چركەساتی ئێستا (present moment) دا بژی. ئەمەش بۆ دابڕانە لە بیر و هەست و ئەزموونەكانی رابردوو، بەڵام ئەمە پێویستی بە هەوڵێكی زۆرە لە راهێنان و ئەنجامدانی یۆگا و مێدیتەیشن. ئەوەی وای كردووە كە گەیشتن بەم دۆخە قورس بێت، بوونی یادگەیە، مرۆڤ بە هۆی گەشەسەندنی مێشكی و ئاڵۆزبوونی سیستەمی دەماری و بەهێزبوونی یادگەیەوە، ناتوانێ بەردەوام لە ئێستادا بژی، چونكە یادگە لە روی فیزیۆلۆجییەوە رابردوو و داهاتووی دروست كردووە، رابردوو و داهاتوش بەردەوام چركەساتی ئێستا پڕ دەكەن لە خۆیان و بیركۆیی مرۆڤ دەشێوێن، بۆیە هەرچەندە یادگە لە لایەكەوە هۆكارێكی گرنگ بووە لە مێژوودا بۆ مرۆڤ بۆ فێربوون و ناسینەوە، بەڵام لە رووی خۆداماڵین لە بیر و هەست و ئەزموونەكانی رابردوو، دوژمنی مرۆڤە. یادگە وا دەكات زۆر جار مرۆڤ بە رابردووەوە پەیوەست بێ و بەردەام خۆی گیرۆدەی نۆستالۆجیا بكات و نەتوانێ ئەزموونی نوێ و چركەساتی نوێ بخولقێنێ.
