وێنە، یەكێكە لەو دۆستە نزیك و هاوسۆزەی كچان و خانمان، جاران ئەلبومی وێنە هەبوو، كە زیاتر لەلایەن كچان و ئافرەتانەوە بایەخیان پێدەدرا، تەنانەت هەر یەكێك، ئەلبومێك یان دوو ئەڵبومە وێنەی هەبوو، ئێستا ئەگەرچی وێنەی نێو ئەلبوم ئەوەندە باوی نەماوە، زیاتر وێنە لە نێو تۆڕی كۆمەڵایەتی و ئامێرەكاندا هەڵدەگیرێن، هەر بۆیە كچان و ئافرەتان رۆژانە وێنەی خۆیان بە شێوازی خۆیی (سێلفی)، یان بە كۆمەڵ لەگەڵ هاوڕێیان و دەستە خوشكانیان بۆ یادگاری دەگرن. وەك هەمیشە كچان و خانمان لە شێوەی خۆیان رازی نین لە وێنەكاندا، لێرەدا چەندین ئامۆژگاری و رێنمایی هەن، تا لە وێنەدا جوانتر و گەشتر دەربكەویت:
- زەردەخەنە و پێكەنین : هەمیشە لە نێو وێنەكاندا، با دەم بە خەندە و لێو بە زەردەخەنە و رووخسار بە پێكەنین بیت، چونكە جوانیت بەندە بە پێكەنین و زەردەخەنەوە.
- ئامادەكردن : كاتێك ویستت وێنە بگریت یان كاتێكی دیاری كراوی بۆ دانرابوو، پێش كاتەكەی رووخسارت پاك بكەرەوە و سەیری ئاوێنە بكە و بزانە هیچ گرفتێكت نییە، پاشان ئامادەی وێنەگرتنەكە بە.
- سەیركردنی كامێرا : ئەو وێنانەی زیاتر جێگەی سەرنج و بایەخن، كە كەسەكە سەیری نێو زوومی كامێراكە نەكات، بەڵكو ئاراستەی رووی چاوی بەرەو لایەكی كامێراكە بێت، واتە هەوڵدە راستەوخۆ سەیری كامێراكە نەكەیت، یان رووخسارت لار بكەوە و چاویشت لەسەر كامێرا بێت.
- وەستان : مەرج نییە جەستەت رێك و راستەوخۆ بەرامبەر كامێرا بێـت، بەڵكو دەتوانی جەستەت بۆ لایەك لار بكەیتەوە، واتە راستە یان چەپەت بەرەو رووی كامێراوە بێت، ئەوەندەش نەبێت كە بە نا ڕێكی دەربكەوێت، بەڵكو لاركردنەوەكی سادە بێت.