لە ساڵی 2003وە خەون بەوە دەبینێت كە نازناوی (ریپۆنزڵ)ی پێبدرێـت، ئەو وشەیەش واتا خاوەن درێژترین قژ، ئەوەیە چیرۆكی ئەو كچە رووسییەیە كە ساڵانێكە لە خزمەتكردنی پرچی بەردەوامە و بە بێ ئەوەی كەرەستە و ماددەی بەهێزكردنی قژ بەكاربهێنێت، لە بەر ئەوەی دەیەوێ درێژیی پرچی سرووشتی بێت، نەوەك وەك ئەوانەی دەرمان بەكاردەهێنن، تا پرچیان درێژ بێت. ئەو كچە ناوی (داشا گۆبانۆڤا)یە و درێژی باڵای (175) سەنتیمەترە، كەچی ئێستا پرچی لە خۆی درێژترە، خوازیاریشە كە قژی دوو ئەوەندەی خۆی درێژتر بێت، وەك خۆی دەڵێ: «كاتێك داپیرەم ئەو بیرۆكەیەی بە مێشكمدا هێنا، هەمیشە دەیگوت ماوە ماوە شیر لە پرچت بدە، تۆ دەبیت بە خاوەن درێژترین پرچ، درێژی ئێستای پرچم (190) سەنتیمەترە و بە نیازیشم پرچم نەبڕم تا دەگاتە دوو مەتر و نیو.» ئەگەر ئەو كارە بكات دەبێتە ژمارەیەكی پێوانەیی لە جیهان و ئەو كاتەش نازناوی درێژترین پرچی بەردەكەوێت و دڵی دادەكەوێت.
