سوپای لوبنان ناوی ئەو دەوڵەتانەی بەهۆی تەقینەوەکەی بەیرووت، هاوکاریی وڵاتەکەیان کردووە، ئاشکرا دەکات.

سوپای لوبنان بە وەرگرتن و پێشوازیکردن لە کۆمەکە نێودەوڵەتییەکان راسپێردراوە، کە دوای تەقینەوەکە، دەگەنە بەیرووت.

هەرچەندە عێراق بە نەوت و گازی سروشتی هاوکاریی لوبنانی کردووە، بەڵام سوپای لوبنان ناوی عێراقی لە لیستی ئەو وڵاتانەی هاوکارییان ناردووە، بڵاو نەکردووەتەوە.

رۆژی سێشەممە 4-8-2020، تەقینەوەیەکی بەهێز لە بەندەرێکی بەیرووت رووی دا و بەپێی دوایین ئامار، 157 کوژراو و زیاتر لە پێنج هەزار برینداریان لێکەوتەوە، جگە لە وێرانبوونی بەشێکی شارەکە و تێکچوونی ماڵ و حاڵی زیاتر لە 300 هەزار کەس.

تەقینەوەکە بە گەورەترین تەقینەوەی ناناوکی لەسەر زەوی هەژمار کراوە، چونکە بچووکتر بوو لە تەقینەوە ناوکییەکان و زۆر گەورەتربوو لە تەقینەوە ئاساییەکان.



سوپای لوبنان ناوی ئەو دەوڵەتانەی ئاشکرا کردووە، کە بریتین لە؛

- چیک

تیمێکی 36 کەسی بۆ گەڕان بە دوای بێسەروشوێنبووان

- پۆڵەندا

تیمێکی 55 کەسی بۆ گەڕان بە دوای بێسەروشوێنبووان و 12 پزیشک

- هۆڵەندا

تیمێکی 65 کەسی،کە پێکهاتوون لە پزیشک، بەرگریی شارستانی و ئەندازیار بۆ گەڕان بە دوای بێسەروشوێنبووان

- بەلجیکا

بارێکی فڕۆکەی پڕ لە کەلوپەلی تەندروستی

- ئیتاڵیا

تیمێکی 18 کەسی،کە پێکهاتوون لە پزیشک و تیمی گەڕان بە دوای بێسەروشوێنبووان

- فەرەنسا

تیمێکی 55 کەسی بۆ گەڕان بە دوای بێسەروشوێنبووان

ئەڵمانیا

تیمێکی 55 کەسی بۆ گەڕان بە دوای بێسەروشوێنبووان و تیمێکی پزیشکیی پێکهاتوو لە پێنج کەس.

- ئوردن

تیمێکی پزیشکیی پێکهاتوو لە 99 پزیشک و کارمەندی تەندروستی و نەخۆشخانەیەکی 48 قەرەوێڵەیی مەیدانی

- ئەمریکا

دوو فڕۆکەی پڕ لە هاوکاریی مرۆیی

- قەتەر

تیمێکی 45 کەسی بۆ گەڕان بە دوای بێسەروشوێنبووان، دوو نەخۆشخانەی 500 قەرەوێڵەیی مەیدانی و شەش فڕۆکەی پڕ لە کەلوپەلی تەندروستی و خواردن

- تورکیا

تیمێکی پزیشکیی پێکهاتوو لە 37 کەس و تیمێکی 17 کەسی بۆ گەڕان بە دوای بێسەروشوێنبووان

- رووسیا

تیمێکی 157 کەسی بۆ گەڕان بە دوای بێسەروشوێنبووان و نەخۆشخانەیەکی مەیدانی

- کوێت

فڕۆکەیەکی پڕ لە هاوکاریی مرۆیی و تەندروستی

- یۆنان

تیمێکی 12 کەسی بۆ گەڕان بە دوای بێسەروشوێنبووان

- ئێران

نەخۆشخانەیەکی مەیدانی

- جەزائیر

تیمێکی 39 کەسی بۆ گەڕان بە دوای بێسەروشوێنبووان و تیمێکی پزیشکی پێکهاتوو لە 11 کەس

- مەغریبی عەرەبی

نەخۆشخانەیەکی مەیدانی و تیمێکی پزیشکیی پێکهاتوو لە 60 پزیشک و کارمەندی تەندروستی

- عومان

هاوکاریی پزیشکی

- پاکستان

هاوکاریی پزیشکی و مرۆیی

- قوبرسی یۆنانی

تیمێکی 10 کەسی بۆ گەڕان بە دوای بێسەروشوێنبووان

- تونس

دوو فڕۆکەی پڕ لە کەلوپەلی تەندروستی و خۆراک

- کازاخستان

تیمێکی پزیشکی و کەلوپەلی تەندروستی و خواردن

- میسر

کەلوپەلی پزیشکی

- ئیمارات

کەلوپەلی تەندروستی بۆ سوپا

- سویسرا

کەلوپەلی مرۆیی بۆ سوپا

سعودیە

دوو فڕۆکەی پڕ لە خواردن و کەلوپەلی تەندروستی

- بەحرێن

کەلوپەلی پزیشکی












باسنيوز