میدیاكانی دەسەڵات و ئۆپۆزسیۆن بە توندی هێرش دەكەنە سەر داودئۆغلۆ و باباجان
داودئۆغلۆ و باباجان، پێشتر لە پۆستی باڵای حكوومەت بوونە لەسەر لیستی ئاكەپە، بەڵام بەهۆی ناكۆكییان لەگەڵ رەجەب تەییب ئەردۆغان سەرۆكی ئاكەپە و سەركۆماری توركیا، لە ئاكەپە جیا بوونەوە و هەریەكە و بە جیا پارتێكی تازەیان دامەزراند.
ماوەیەكە لەلایەن میدیاكانی سەر بە ئاكەپە و مەهەپەوە بە توندی هێرش دەكرێتە سەر داودئۆغلۆ و باباجان، میدیاكانی ئۆپۆزسیۆنیش پێیان دەڵێن ئێوە لە هەموو هەڵەیەكی ئاكەپەدا بەشدارن، چونكە یەكتان سەرۆك وەزیران بووە و ئەوی تریش وەزیری دارایی و ئابووری.
رەحمی توران، نووسەری دیاری رۆژنامەی (سۆزجو)ی توركی، لە نووسینێكدا رەخنە لە میدیای ئۆپۆزسیۆن دەگرێت، بەوەی ناكرێت ئەوانیش بە هەمان ئاوازی میدیای ئاكەپە بخوێنن و رەخنە لەو دوو سەركردەیە بگرن.
توران پێیوایە، راستە ئەو ٢ سەركردەیە پێشتر ئاكەپە بوون، بەڵام ئۆپۆزسیۆن رەخنەیان لێ بگرێت لە خزمەتكردن بە پارتی دەسەڵات زیاتر هیچی تریان دەست ناكەوێت.
ئەو وتەیەكی مەولانا دەهێنێتەوە: "دوێنێ لەگەڵ دوێنێ رۆیشت، بۆیە پێویستە ئەمڕۆ شتی تازەمان پێ بێت و بیڵێین".
توران لە وتارەكەیدا دەنووسێت: "داودئۆغلۆ و باباجان زۆر گۆڕانكارییان بەسەردا هاتووە، ئێستا رێگای راستیان دۆزیوەتەوە و پێشتر نەیانزانیوە ئاكەپە چۆنە و ئامانجی چییە، بۆیە ئێستا ئەو دوو سەركردەیە دەیانەوێت هەڵەكانی ئاكەپە ئاشكرا بكەن، بۆیە ئاساییە ئاكەپە لەو دوو سەركردەیە تووڕە بێت و رەخنەیان لێ بگرێت، چونكە كەمبوونەوەی هەر دەنگێكی ئاكەپە بۆ ئەو دوو پارتە دەڕوات، بەڵام نازانم بۆچی ئۆپۆزسیۆن لەو ٢ سەركردەیە نیگەرانن".
باسنيوز
